Bya Ssemakula John
Kampala
Ekitongole ky’ ensi yonna ekikola ku buwangwa n’ennono ki UNESCO ku Mmande kyasembye Amasiro g’ e Kasubi gaggyibwe ku lukalala lw’ebifo eby’ennono ebiri mu katyabaga k’okusaanawo.
Ekiteeso ekisemba kino kyasaliddwawo eggulo ku Mmande oluvannyuma lw’ alipoota y’ekitongole kino eyakolebwa oluvannyuma lw’abakulu baakyo okulambula enteekateeka y’okuzzaawo Amasiro gano.
Kino kiddiridde omulimu gw’okuzimba ennyumba enkulu eya Muzibu- Azaala-Mpanga omugalamidde ba Ssekabaka ba Buganda abawerako okutambula obulungi wakati mu kugoberera ennono n’obuwangwa okuva lwegaali gakosebwa omuliro mu 2010.
Ssaabasajja Kabaka Ronald Muwenda Mutebi II nga asisinkanye abakulu okuva mu UNESCO
Amasiro gano gaali gateekebwa ku lukalala lw’ebifo ebyenjawulo neku lukalala lw’ebifo ebisaana okukuumibwa mu nsi yonna wansi wa UNESCO mu 2001.
Kati ekirindiriddwa kwekulaba oba akakiiko k’amawanga 21 aka World Heritage Committee akagenda okutuula wakati wa 10- 25 e Riyadh mu Saudi Arabia kanaawagira ekiteeso kino.
Kinajjukirwa nti Amasiro gano gaakosebwa omuliro ogwakwata ennyumba ya Muzibu-Azaala-Mpanga eyali yazimbibwa mu 1882 nga okusooka luno lwali Lubiri naye oluvannyuma negafuuka Amasiro.
Okusinziiira ku UNESCO, Amasiro gano gaazimbibwa nga ganjawulo era singa gaggyibwa ku lukalala luno kya makulu nnyo kuba ebifo 50 ebirala ebiri mu ttuluba lino mu Afirika bisuliridde okusaanawo.
Kinajjukirwa nti Nnyinimu Ssaabasajja Kabaka Ronald Muwenda Mutebi II yalambula Amasiro gano era naatendereza omulimu ogwali gukoleddwa olw’obukugu n’okugoberera emitendera.