Bya Ssemakula John
Kampala
Ekitongole ekivunaanyizibwa ku bigezo mu ggwanga ekya ‘Uganda National Examination Board (UNEB)’ kitegeezezza nti ebivudde mu bigezo by’abayizi abawera 2220, bikwatiddwa olw’okwenyigira mu mize egy’okukoppa era nga bino bakuddamu okubyetegereza.
Bino byogeddwa akulira ekitongole kya UNEB, bw’abadde awaayo ebyavudde mu kugolola ebibuuzo by’ekibiina eky’omusanvu eby’omwaka 2020 mu maka g’Obwapulezidenti Entebbe ku Lwokutaano.
“Ng’esinziira mu kawaayiro nnamba 5(2b) ak’etteeka lya UNEB Act, ekitongole kikutte ebigezo by’abayizi 2220 ng’
Okusinziira ku Odongo amasomero agasinze okubeera n’abayizi ebibuuzo byabwe ebikwatiddwa okusinga g’e Kasese ne Bundibugyo n’ekitundu ky’ensozi za Rwenzori.
Omuwendo gw’ebibuuzo by’abayizi ebikwatiddwa gweyongedde ne gutuuka ku 2220 okuva ku 1512 ebyakwatibwa omwaka oguwedde so nga mu 2018 ebyakwatibwa byali 3500.
Odongo agamba nti abo bonna abeenyigira mu kubba ebibuuzo, bagenda kukolwako ng’amateeka bwe galagira.
Bino we bijjidde ng’etteeka eppya erya UNEB 2021 lyakamala okuyisibwa Palamenti okusobola okukola ennongoosereza mu tteeka lya 1983 eribaddewo era lino liwa ekibonerezo ekikambwe eri abayizi abakwatibwa mu kubba ebibuuzo.
Emisango egivunaanibwa gyeyongera mu tteeka lino okuva ku 7 egyaliwo ne gituuka ku 13 era mulimu engassi wamu n’okusibwa wakati w’emyezi 6 n’okutuuka ku myaka 5.
Mu tteeka lino, singa omuyizi akwatibwa ng’abba ebigezo ne gumusinga, asobola okusibwa emyaka 5 oba okuwa engassi ya bukadde 40 oba byombi.
70000 bagudde
Ebifulumiziddwa era biraze ng’abayizi 74,878 bwe baagwa n’enkoona n’enywa era nga balina kukola kimu kuddamu kibiina bwe baba baagala okweyongerayo.
Bano bakola ebitundu 10.2 ku buli 100 ku muwendo gw’abayizi bonna abatuula PLE mu 2020.
Abayizi abawera 749,761 be baatuula ebibuuzo bino ebya 2020 okuva mu bifo ebituulirwamu 14,300 bwogeraageranya n’abayizi 695,804 abatuula mu 2019.
Ku muwendo guno 513,085 (68.4%) baava mu bonnabasome ‘Universal Primary Education (UPE)’ ate 236,677 (31.6%) baali mu ga bwannannyini.