Bya Stephen Kulubasi
Bulange -Mmengo
Katikkiro Charles Peter Mayiga ategeezezza nti wadde omwaka gwa 2021 gwetaaga abantu abakozi era abasobola okutetenkanya naye weetaaga okubaawo emirembe n’okuggyawo obunkenke obukyaliwo mu ggwanga.
![](https://gambuuze.ug/wp-content/uploads/2021/03/Mayiga-1024x684.jpg)
Okulabula kuno Mukuumaddamula akuweeredde ku mukolo gw’okutongoza enkola ya Luwalo Lwaffe ey’omwaka 2021olwa leero mu Bulange era bamwanjulidde ebyava mu Luwalo Lwaffe olw’omwaka oguwedde, n’engeri amasaza gye gaakolamu mu nkola eno.
“Kiwambabantu oba akendeddemu naye abantu bakyali mu makomera bavundirayo, bakuba n’abantu emiggo egiyitiridde n’abatemulwa bangi. 2021 tunaamutetenkanya tutya ng’ensi ekyalemedde ku bunkenke.” Owek. Mayiga bw’agambye.
Owek. Mayiga annyonnyodde nti ebintu byonna ebimalawo emirembe mu ggwanga byetaaga okukoma kuba obukambwe tebusobola kubaako kye buwangula kuba abantu babeera batya omukulembeze okumuwabula w’abeera asobye.
Owek. Mayiga era asinzidde ku mukolo guno n’ateeka gavumenti ku nninga eveeyo ennyonnyole lwaki bbizineesi z’abantu ezimu zikyaggaddwa ate endala ne ziggulwa kyokka nga zonna zikung’aanya abantu bangi era nga kisoboka nazo okukola nga zinywezezza ebiragiro bya Ssennyiga Corona.
“Ono Dube ayinza okulemwa okugamba abantu nti mwesuule amabanga, nze ssaayansi anemye okugatta obanga abantu bagenda mu kwanjula, ekigaana abantu okugenda mu Katemba kye ki? Bagenda mu Klezia, mu kkanisa gye bali buli wantu.” Owek. Mayiga bw’ategeezezza. Katikkiro Mayiga asabye abantu okusigala nga beekuuma ekirwadde kya Ssennyiga Corona nga bwe balinda gavumenti okuvaayo n’okunnyonnyola ku nsonga eno.
Katikkiro Mayiga ategeezezza nti omwaka 2020 gwalimu okusoomooza era emirimu mingi gyakosebwa olwa Ssennyiga Corona eyateeka eggwanga ku muggalo.
Owek. Mayiga asiimye abantu ba Ssaabasajja Kabaka abafubye okuwaayo mu kiseera ekizibu. “Bwe twogera ku mwoyo gwa Buganda ogutafa, Oluwalo luggyayo bulungi omulamwa guno.” Owek. Mayiga bw’agambye.
Ono asabye abantu obutaganya bibasoomooza kubalemesa kutuukiriza bigendererwa byabwe era n’abasaba okubeera abamalirivu kuba Buganda yeetaaga bantu bamalirivu okusobola okutuuka ku ntikko. Asiimye abaami bakunga abantu okuwaayo Oluwalo.
Owek. Mayiga agambye nti bwe wabaawo obuwanguzi abantu ba Buganda kwe balina okutuuka mu mwaka guno ogwa 2021, balina okubeera abatetenkanya. Asabye Abaami ba Kabaka okwongera okulima emmere etundibwa mu butale awamu n’okulima emmwanyi era bagatteko n’okulunda ebinyonyi awamu n’ebisolo.
Mukuumaddamula Mayiga ategeezezza nti abaganda beetaaga okwekuumira ku byabwe nga Ssuubiryo Zambogo SACCO era n’abasaba okugula emigabo, bawagire K2, Engule awamu n’ebitongole ebirala eby’Obwakabaka.