Bya Ssemakula John
Kayunga
Akulira okukunga abantu mu kibiina kya National Resistance Movement (NRM), Rosemary Sseninde asabye bannakibiina mu Kayunga okukomya entalo kuba zibafiiriza obuwagizi nga bwe kyalabikira mu kalulu akaakaggwa aka 2021.
Okulabula kuno Sseninde akuwadde alambula disitulikiti y’e Kayunga ku ssomero lya Bbaale Secondary School ku Lwokubiri n’asaba abakulembeze b’eggombolola y’e Bbaale okubaako kye bakola oba si ekyo ekibiina kyakwongera okufiirwa obuwagizi nga buva ku ntalo eziri mu kibiina.
“Ekyatuwanguza mu kalulu akawedde tegaali maanyi ga Opozisoni naye entalo mu bammemba baffe nga NRM. Ezimu ku ntalo zino za buntu naye ziranda mu kibiina naye tulina okuzeewala.” Ssenninde bw’ategeezezza abakulembeze
Ono annyonnyodde nti akaseera katuuse beegatte nga bannakibiina bw’eba baagala ekibiina kyabwe okusigala nga kyamaanyi mu bantu.
“Twafiirwa ebifo bingi eri aba Opozisoni kuba twabawa omukisa. Entalo ezo zirina okukoma kati. Mu kalulu ka ssentebe wa disitulikiti y’e Kayunga. Twegatte tuwagire omuntu omu anaasobola okutwala disitulikiti eno mu maaso.” Sseninde bw’agasseeko.
Sseninde agamba nti akozesezza omukisa guno okuwuliriza ebizibu bya bantu era akkiriza nti bagenda kubifunira eky’okuddamu.
Okusinziira kw’akulira ebyamawulire mu NRM, Emmanuel Dombo, annyonnyodde nti enkiiko zino zigendereddwamu okuzza obuwagizi bw’ekibiina.
Kinajjukirwa nti ezimu ku ntalo ezibadde zitaggwa mu kibiina kino kuliko olw’omubaka Aidah Nantaba ne Ssentebe w’ekibiina kino mu Kayunga, Moses Karangwa.
Olutalo luno lumaze emyaka egisoba mu 10 era kaweefube w’okugonjoola ekizibu eyakulemberwamu Pulezidenti Museveni talina kalungi ke yavaamu.