Bya Ssemakula John
Kampala
Ssaabalamuzi w’eggwanga, Alfonse Owiny Dollo, ategeezezza nti tewali bujulizi bumuluma okulaga kyekubiira mu musango gwa munnakibiina kya National Unity Platform (NUP), Robert Kyagulanyi Ssentamu amanyiddwa nga Bobi Wine, mwe yali awakanyiza obuwanguzi bwa Museveni nga Munnamateeka Male Mabirizi bwe yali alumiriza.
![](https://gambuuze.ug/wp-content/uploads/2021/03/Bobi-1024x576.jpg)
Mabirizi yali asabye Ssaabalamuzi Dollo okuva mu musango gwa Kyagulanyi olw’okubeera ne kyekubiira ng’agamba nti Dollo yali munnamateeka wa Museveni mu musango gw’ebyokulonda ogwa 2006 era nga yasooka kusisinkana Museveni ng’omusango tegunnatandika.
Bw’abadde asoma ensala ye, Ssaabalamuzi Dollo, agambye nti kituufu yali munnamateeka wa Museveni emyaka 15 emabega naye ebiseera bingi ebiyise nga tewali bujulizi bulaga nti mu kiseera kino asobola okwekubiira.
“Tekinkakatako kuvaayo mu lwatu kutegeeza nti nali munnamateeka wa Museveni kuba kimanyiddwa eggwanga lyonna era ensi emanyi engeri gye nalondebwamu.” Ssaabalamuzi Dollo bw’annyonnyodde. Ssaabalamuzi agamba nti wadde kituufu omuntu alina okuwulirwa abalamuzi abeetengeredde naye ate tekikola makulu kugendera ku bigambo awatali bujulizi bulaga kwekubiira buba bw’ogerwako.
“Nkisaanye okumanyibwa nti abalamuzi nabo bantu era okutuuka gye bali balina abantu ab’enjawulo be bakolagana nabo. Noolwekyo omuntu asaba omulamuzi okuva mu musango alina okubeera n’obujulizi obwesimba.” Owiny Dollo bw’agasseeko. Akalambidde nti wadde yali munnamateeka wa Museveni emyaka 15 emabega naye tekisobola kukozesebwa kati kulaga nti alina kyekubiira. Ku nsonga y’okusisinkana omukulembeze w’eggwanga, Dollo annyonnyodde nti Museveni yamusisinkana ng’alayiza omu ku balamuzi ba kkooti enkulu abaggya ku lunaku lw’okujjukirwa Janan Luwum wamu ne bwe yali atutteyo embalirira y’ekitongole ekiramuzi mu maka g’Obwapulezidenti Entebbe. Bino byonna byali misana ng’ensi eraba era ne kkamera zaaliwo.
Ono agamba nti tewali bujulizi bwonna bulaga nti yali asisinkanyeeko Museveni mu kyama. Dollo yennyamidde olwa Mabirizi okusaba ebiwandiiko ebimukwatako ng’anoonya okuzuulamu ensobi.Ssaabalamuzi agamba mu bbanga lye lyonna nga Ssaabalamuzi abadde yetengeredde era aliko abantu bangi b’awolereza omuli aba Obote n’aba Ssaabayeekera Yozefu Kony ate nga baali tebakwatagana na gavumenti.
Dollo agamba Mabirizi talina buyinza kumusaba kuva mu musango kuba teyali omu ku bawaabi wadde okubeera omu ku bantu abeesimbawo mu kalulu ka 2021.
Alaze nti kikyamu abantu abamu okutandika okulowooza nti endowooza zaabwe buli omu azikkiririzaamu.
Wabula Male Mabirizi ategeezezza bannamawulire nti omusango guno waakugwongerayo mu kkooti ya East Africa asobole okufuna obwenkanya.