Musasi waffe
![](https://gambuuze.ug/wp-content/uploads/2020/07/WhatsApp-Image-2020-07-13-at-2.05.15-PM-1024x683.jpeg)
Katikkiro wa Buganda, Oweek. Charles Peter Mayiga agambye nti Buganda tesobola kugenda mu maaso singa abantu tebakoma kukukkuluma na kwekubagiza ku byayita.
Bwabadde mu kuziika mugandawe Joseph Kalizibwe e Kasanje Masaka mu Buddu, Mayiga yagambye nti newankubadde nga eggwanga lirina ebyafaayo ebitasanyusa, abantu tebateekeddwa kwesiba nnyo ku byayita.
“Tetwagala Buganda yakukukkuluma; ekitiibwa kya maka tekisobola kubeera mu byayita. Tulina kutambula nga tugenda mu maaso ensi bwetyo bwekula. Kittamwe mu mujjukireko buli kirungi kyonna mu kirondoole mukitwale mumaaso obulamu bwammwe bubeere bulungi,” Mayiga bweyagambye.
![](https://gambuuze.ug/wp-content/uploads/2020/07/WhatsApp-Image-2020-07-13-at-2.05.13-PM-1024x683.jpeg)
Ono yasaasidde nnyo abaana n’omukyala olw’okuviirwako omuntu waabwe gwebabadde baagala ennyo.
Ono yategeezezza nti bwetuba twagala enkulaakulana mu Buganda tuteekeddwa okubaako akantu ke tulondoola ku muntu.
“Wano mu Buganda abaana tubakuutira nnyo okutwala empisa za bakadde baabwe babeeko byebalondoola okugenda mu maaso,” Mayiga bweyagambye.