Bya Ssemakula John
Kampala
Minisita w’ebyokwerinda, Maj Gen Jim Muhwezi akakasizza bannayuganda nga bwewatali nsonga erina kubeeraliikiriza ku kkampuni ya Russia eyaweereddwa olukusa okuteeka obuuma obulondoola mu mmotoka ne Pikipiki.
Kino kiddiridde bannayuganda okutandika okubuusabuusa kkampuni eno eya Joint Stock Company Global eyaweereddwa endagaano y’emyaka 10 olw’ebigambibwa nti etubidde mu mabanja.
Kigambibwa nti kkampuni eno erina emisango gyetuuka nagyo era nga kigambibwa nti ebangibwa obulindo bwa ssente okuva mu kkampuni ez’enjawulo mu ggwanga lya Russia.
Bannayuganda naddala ebitongole ebirondoola ssente z’abawi b’omusolo bagamba nti gavumenti tesaanye kwesiga kkampuni eno kuba ebizibu byerina ku butaka e Russia bingi nnyo.
Bweyabadde ayogera ku nsonga eno, Minisita Muhwezi agamba nti tewali kirina kwelarikiriza bannansi kuba buli kimu bakisalidde dda amagezi.
“Minisitule y’ebyokwerinda yategedde ku biyitingana ku bizibu by’ebyensimbi ebya kkampuni ya Global Security. Naye nga Ssaabawolereza bweyalung’amizza, enteekateeka eno erudde nga ekolebwako era ebimu ku bino byakanyizibwako dda,” Muhwezi bwe yagambye nga ayita ku mukutu gwa Twitter.
Minisita Muhwezi agamba nti obuwaayiro obuli mu ndagaano eno bulambulukufu era buwa gavumenti obuyinza okukuuma obulungi ebikwata ku bigenda okukung’aanyizibwa singa wabaawo ebirumira.
Okusinziira ku biwandiiko ebyafuniddwa biraga nti kkampuni ya Joint Stock Company Global Security yatwalibwa mu kkooti aba LLC “Rus Prom-Technologies” nayo eya Russia nga eyagala erangirirwe nga enjavu.
Era waliwo n’emisango emirala kkampuni ez’enjawulo mu Russia gyezatwala mu kkooti nga gyekuusa ku mabanja kkampuni eno geerina.
Wabula ku ntandikwa ya wiiki eno, Ssaabawolereza wa gavumenti yategeezezza omukutu gwa Uganda Radio Network nti woofiisi ye yenyigira butereevu mu kuteeka omukono ku ndagaano ne kkampuni eno, era nakakasa nti tewali nsonga erina kwelariikiriza bannayuganda.
“Kituufu, endagaano yaleetebwa mu woofiisi yange, twagikakasa era tulowooza nti nnungi. Twagikakasa nga tumaze okwekeneenya amateeka gaffe era tukakasa nti tewaliwo musango gwonna gukwatagana na mabanja gwebawaabira kkampuni eno mu Uganda,” Ssaabawolereza Kiryowa Kiwanuka bwe yagambye.