Bya Shafik Miiro
Bulange – Mmengo
Minisita w’ Amazzi, Obutondebwensi ne Bulungibwansi, Owek. Mariam Nassejje Mayanja Nkalubo asabye abantu okusigala nga balima emmwaanyi beesonyiwe abo abaagala okuzibagobako.
Obubaka buno abuwadde atikkula Oluwalo kulwa Katikkiro okuva mu Balyannaka ne Bannabuluuli e Bulange Mmengo ku Lwokubiri.
“Omweyogereze takusuuza kayanzi ko, ate n’anaakugoba ku nswa, nti tolya omulalu, abalabyeko ku mmwanyi mulabyeko era ababadde tebannalozaako nabo bali mu nnimiro basimba mmwanyi n’olwekyo tubakubiriza mugende mu maaso mulime emmwanyi era muzirime bulungi Owek. Nkalubo bw’agambye.
Owek. Mayanja abakuutidde okufaayo ennyo ku mutindo gw’emmwaanyi, nga bazirabirira, okuzifukirira mu biseera eby’omusana, n’okuzaanika obulungi olwo bongere okuziganyulwamu era bakulaakulane.
Minisita Nkalubo era akubirizza abantu ba Buganda okweyambisa ekiseera kino eky’enkuba okutereka amazzi nga basima ebidiba okugalembeka gabayambeko mu biseera eby’omusana naddala mu mwezi gwa Gatonnya ogusembedde.
Owek. Nkalubo abantu abannyonnyodde ku mugaso oguli mu kufaayo ku nsonga y’Obutondenwensi nga beewala ebyo ebikosa emigga, ennyanja n’entobazzi kubanga bino bisimbira ddala mu buwangwa n’ennono za Buganda.
Ye Minisita w’Amawulire n’Okukunga, Owek. Israel Kazibwe Kitooke kulwa Minisita wa Gavumenti ez’Ebitundu Joseph Kawuki, akubirizza abantu okukuuma ettaka lyabwe era bafube okulikolerako kibayambe okulitaasa ku basaatuuusi.
Owek. Kitooke era akunze abalimi okutassa mukono basigale nga balima emmwaanyi era nalabula ne bannabyabufuzi obutamala googera bigambo kubanga ebimu bisobola okwawula mu bantu n’okusuula eggwanga mu buzibu.
Omwami w’Essaza Buluuli, Owek. Kimbugwe Ssonko Robert kulwa banne bakulembedde okukiika embuga yeeyamye okugenda ku maaso n’okuleeta oluwalo basobole okuwagira emirimu gya Nnyinimu.
Eggombolola musanvu (7) zeezivudde e Bulemeezi ate nnya (4) neziva e Buluuli era muno mubaddemu Bannaddiini, Abakulembeze mu Gavumenti eya wakati, abaana ab’amasomero n’abantu ba Kabaka abalala era bonna wamu baleese omugatte gwa bukadde 46.