Bya Musasi Waffe
Kampala
Eggye lya Uganda Peoples Defence Forces (UPDF) lirabudde bannayuganda okugondera ebiragiro eby’okulwanyisa COVID-19 oba ssi kyo bajja kukomyawo aba LDU ku nguudo bayambeko okubikwasisa.
![](https://gambuuze.ug/wp-content/uploads/2020/08/ldu-mu-Kampala.png)
Okulabula kuno kukoleddwa omwogezi wa UPDF, Brig Flavia Byekwaso ku Lwokuna bwabadde ayogerako ne bannamawulire mu Kampala nategeeza nga obulwadde bwa Corona bwebweyongedde olw’ abantu okutafaayo kukuuma biragiro bino ebibutangira.
Yagasseeko nti singa embeera eyongera okubeera bweti, UPDF tegenda kusibamu kukomya aba LDU.
Byekwaso yagambye nti, “Bwetutambula mu bantu olaba nga abantu tebakyafaayo ku biragiro bitangira COVID-19, singa kisigala bwekiti tugenda kuba tetulina kyakusalawo okujjako omukomyawo aba LDU.
Ono yanyonyodde nti wadde aba LDU baddamu okubatendeka, bannansi balina okulaba nga bagondera ebiragiro bya Minisitule y’ebyobulamu.
“Kituufu aba LDU twazzeemu okubalaga engeri gyebalina okukwatamu abantu nga bakola emirimu gyabwe netubayigiriza amateeka n’ebintu ebirala bingi,” Byekwaso bweyalambuludde.
Byekwaso ayongedde okulabula abantu abayingira Uganda ku nsalo ez’enjawulo mu bubba nga bakolagana n’abebyokwerinda nti bajja kuvunaanibwa.
Bannayuganda mu bitundu eby’enjawulo bavaayo nebalaajanira Pulezidenti Yoweri Museveni aggye aba LDU ku nguudo olw’okutulugunya abantu era nga waliwo nabalugulamu obulamu.
Pulezidenti yalagira aba LDU nebaggyibwa ku nguudo era nebatwalibwa okuddamu okutendekebwa ku ngeri gyebasobola okukolaganamu n’abantu nga bakola emirimu gyabwe.