![](https://gambuuze.ug/wp-content/uploads/2020/07/Nmais.png)
Ab’ebyokwerinda basazeeko ekyalo ky’e Bumandli A wamu n’akabuga ka Buwasunguyi mu ggombolola y’e Namabya mu disitulikiti ye Namisindwa oluvannyuma lw’omuntu omulala okufa ku biteeberezebwa nti kirwadde kya Ssenyiga Kolona kiyite Covid-19.
Omugenzi ye Martin Muyenlitsi, oweemyka 27.
Muyenlitsi yafiiridde ku kalwaliro ka Buwasunguyi ku ssaawa nga 11 ku makya gyeyadusiddwa oluvannyuma lw’okulumizibwa mu kifuba wamu n’okuba nga tassa bulungi.
Kino kyekireetedde Poliisi ng’eduumirwa omubaka wa gavumenti mu disitulikiti y’e Namisindwa Moses Kigai Wamoto okusalako ebyalo bino.
Enguudo zonna eziyingira mukitundu zigaddwa ssaako amaduuka gonna.
Abakkirizibwa okutambula babyakwerinda bokka wamu n’abakozi b’e ggombolola.
Wabaddewo okusika omugwa wakati w’aba famire y’omugenzi ssaako n’abaddukanya akalwaliro kano nga bagezaako okukaayanira omulambo.
Abenganda baagambye nti omugenzi abadde n’ebirwadde ebimutawaanya nga tekisoboka okuba nti yafudde Covid-19.
Joseph Khisa ssentebe w’eggombolola ya Bukhaweka bwebasalaganya ne ggombolola ye Namabya, yagambye nti abenganda z’omugenzi baategeezezza nti ono abadde n’akawuka ka mukenenya era nga abadde mulwadde ennaku eziyise.
Rogers Wabuteya, nannyini kalwaliro kano ng’ono era akola n’eddwaliro ly’e Bududa yagambye nti omugenzi abadde n’obubonero bwekirwadde kya Covid-19.
Ono yagambye nti yeegayiridde abenganda z’omugenzi bamutwale mu ddwaliro eddene e Mbale kyokka bbo nebeerema.
“Bwenabagambye beeremye nga bagamba nti tebaagala kugenda okutuusa omulwadde bweyafudde,”Wabuteya bweyagambye.
Okufa kwa Muyenlitsi wekujjidde nga tewannayita na wiiki oluvannyuma lw’okufa kwa Yunis Chamitala mu ggombolola yeemu nga naye yafa Kolona.
URN