Bya Ssemakula John
KAMPALA
Minisitule y’ebyobulam ekakasizza nga abantu 318 bwebazuuliddwa n’ekirwadde ki ssennyiga Corona, bano bakebeddwa eggulo ku Lwokutaano, ekituusizza omuwendo gw’abakakwatibwa ku bantu 2,166.
Bwabadde ayogerako eri bannamawulire ku Lwomukaaga, Minisita Jane Ruth Aceng yagambye nti, guno gwe muwendo ogukyasinze okubeera waggulu okuzuulibwa okuva ekirwadde kino lwekyabalukawo.
![](https://gambuuze.ug/wp-content/uploads/2020/08/aceng-1024x768.jpg)
Aceng yategezezza nti abasangiddwa n’obulwadde tekuli ali mu mbeera mbi. Ku 154 kuliko abasibe okuva mu kkomera lya Amuru wamu n’omukozi w’ekkomera lino omu.
Ono yanyonyodde nti gyebabayise olw’okwekengera wamu nabo abateeberezebwa okubanga babaddeko n’abalwadde, bazudde abantu 65 okuva mu Kampala, 9 bazuuliddwa Mbarara, Kiryandongo 14, ate e Gulu basanzeeyo 9.
Aceng yalambuludde nga abasawo 20 nabo bwebasangiddwa ne COVID19; Bano 9 b’e Kitgum, 6 bavudde Kampala, 2 Arua, Adjumani basanze 1, Kiryandongo 1 n’e Luweero bazuddeyo 1.
Ku muwendo oguzuuliddwa leero kuliko abavuzi b’ebimotoka abayita ku nsalo ez’enjawulo 8, Aceng era yakakasizza nga omuwendo gw’abavudde bwegutuuse ku Bantu 20.
“Kati omuwendo gw’abafudde guweze 20, tufiriddwayo omuntu era nga ono mwami wa myaka 49 okuva e Mbale,” Aceng bweyakakasizza.
Minisita Aceng yagambye nti, omuwendo gw’abantu abasinze okukwatibwa ekirwadde kino gusinga mu kibuga Kampala n’emirilaano nga eno okuva March 23 bakafuna abalwadde 540.
Ku bano 342 bazuuliddwa mu wiiki emu yokka wakati wa August 15 ne 21, era nga mu bbanga lyerimu abakafa Corona mu Kampala bali 5.
Aceng yagasseeko nti, “Amakampuni mangi omuli; Malaysia Furnishing, Royal Pharma, Ministry of Finance, Planning and Economic Development, IGG,KCCA, Toyota, NRM Secretariat, Eagle Holdings,Megha Industries, n’emikutu gy’amawulire wasangiddwayo abalwadde, Kkampuni zonna tuzisaba zongere okuteeka amateeka n’ebiragiro bya COVID19 mu nkola.
Aceng yagambye nti kizuuliddwa nga omusibe eyasangiddwa e Amuru bwabadde yakamala okusiiga abantu abalala 20 ekirwadde kino, ono n’omukozi w’ekkomera mu kiseera kino batwaliddwa mu ddwaliro ekkulu e Gulu gyebali mukujjanjabibwa.
Kitegeerekese nti Minisitule y’ensonga z’omunda mu ggwanga wamu n’ekitongole ky’amakomera, bamaze okusengula abasibe 152 abasangiddwa ne COVID19 nebatwalibwa mu kkomera lya Gulu Central Prison bafune obujjanjabi.
Bino webigidde nga Minisita wa Kampala Betty Amongi, yakamala okulabula bannakampala nga bwebayinza okudda ku muggalo ssinga bagenda mu maaso n’obutagondera biragiro bya COVID19.