Bya Francis Ndugwa
Mmengo – Kyaddondo
Nnyinimu Ssaabasajja Kabaka Ronald Muwenda Mutebi II asisinkanye Ssenkulu w’ekitongole ki UNESCO ekivunaanyizibwa ku by’obuwangwa n’ebintu eby’enkizo mu nsi yonna, Lazare Eloundou Assomo.
Ensisinkano eno eyindidde mu Lubiri e Mmengo ku Lwokubiri era wano Nnyinimu wasinzidde nasaba aba UNESCO baddemu okwekenneenya omulimu gw’okuzzaawo Amasiro gano wegutuuse.
“Njagala okusaba nti olw’okuba emirimu egisinga egy’ennono n’obuwangwa giwedde wakati mu kugoberera buli kimu ku mutindo gw’ensi yonna. Njagala UNESCO etunule mu ky’okuddamu okwekenneenya Amasiro gano agakyali ku lukalala lw’ebifo bya UNESCO ebyolekedde akatyabaga erabe embeera mwegali era egazze mu lukalala lw’ebifo ebyenkizo mu nsi yonna kweyali egatadde mu 2001,” Omuteregga bw’ategeezezza.
Kabaka annyonnyodde nti Obuganda bujja kuba busanyufu singa kino kinaakolebwa era okusaba kwa Buganda nekuyitamu mu lukungaana lwa UNESCO olw’omwaka 2023 olugenda okutuula mu September mu ggwanga lya Saudi Arabia.
Ssaabasajja Kabaka agambye nti wadde Buganda ewangaalira mu mbeera y’ebyenfuna etali nnungi naye bafuna essuubi bwebafuna obuyambi okuva mu bitongole nga UNESCO n’ebirala ebimanyi obukulu bw’ebifo eby’obuwangwa n’ennono. okubakwasizaako .
“Nga Buganda era ne Afirika tukkiriza nti tosobola kwawula buwangwa ku nkulaakulana. Okuzing’amya Obuwangwa bw’abantu mu ngeri yonna kisobola okubeera eky’obulabe ku nkulaakulana yabwe. Kino era kibeera kikontana ne Katonda eyatonda abantu n’obuwangwa obw’enjawulo,”
Omutanda asiimye aba UNESCO, Gavumenti ya Japan, Gavumenti ya Uganda, n’ akakiiko akali ku mulimu gw’okuzzaawo Amasiro gano akakulemberwa Owek. Kaddu Kiberu olw’omulimu amakula.
Ssenkulu wa UNESCO , Lazare Eloundou Assomo, ategeezezza okuva lweyalinnye ku ttaka lya Buganda alabye abantu abasanyufu era abajjudde essuubi bwatyo neyeebaza Ssaabasajja Kabaka olw’obukulembeze obulungi era namusuubiza okutambulira awamu.
Lazare era yeebazizza Nnyinimu Ssaabasajja Kabaka olw’okukola kyonna okulaba nti Amasiro gano gakuumibwa
Kulwa Katikkiro Charles Peter Mayiga ali ku mirimu emitongole ebunaayira, Omumyuka asooka owa Katikkiro, Owek. Prof. Twaha Kigongo Kaawaase agambye nti abakulu bano bazze kulaba Bwakabaka webutuuse ku mulimu gw’okuzzaawo Amasiro gano.
Owek. Kaawaase annyonnyodde nti omulimu guno bagukoze bagoberera buli kalonda era ebisigadde byakumaliriza mu kaseera akatono ddala era kati amaaso bagatadde kwebyo ebirina okukolebwa oluvannyuma lw’okuzzaawo ennyumba Muzibu-azaalampanga.
Ssentebe w’Olukiiko oluli ku mulimu gw’okuzzaawo Amasiro gano, Owek. Kaddu Kiberu, agambye nti Amasiro gano gamaze emyaka 13 okuva lwegakwata omuliro abantu babadde banyikaavu naye kati bangi bafunye akamwenyumwenyu olw’omulimu amakula ogukoleddwa.
Owek. Kiberu aweze mu maaso ga Nnyinimu nti omulimu gw’okuzzaawo Amasiro guno guwedde nga mu nnaku ntono gujja kuba gukwasibwa Omuteregga.