Bya Gerald Mulindwa
Bulange
Ssaabasajja Kabaka olwaleero ku Lwokutaano asiimye nalonda Omukubiriza w’olukiiko lw’Abataka omuggya oluvannyuma lw’ekisanja ky’Omutaka Kayiira Gajuule Kasibante okuggwako.
Omukubiriza Omuggya ye Jjaja Namwama Augustine Kizito Mutumba, bino birangiriddwa mukiwandiiko ekivudde mu woofiisi ya Ssaabasajja Kabaka nga kiteereddwako omukono gw’ Omuwandiisi wa Kabaka ow’ekyama Omuk. Dunstan Mukiibi Douglas.
Minisita w’Amawulire Omwogezi w’Obwakabaka Noah Kiyimba yategeezezza nti, Beene yasiima nga ennaku z’omwezi 14/ Musenene nalonda Omutaka Kayiira Gajuule Kasibante okubeera Omukubiriza w’olukiiko luno ku kisanja eky’emyaka esatu wabula bwekyaggwako Kabaka nasiima namwongera obukulu buno okutuuka olunaku lwaleero lwamukyusizza.
Owek. Kiyimba yanyonyodde nti Ssaabasajja Kabaka yasiimye emirimu egikoleddwa Omutaka Kayiira Gajuule nga akulembera abakulu b’Ebika era nga ono asobodde okukola ebintu bino wammanga.
Ebimu ku byakoze kuliko; okuwandiisa Obutaka bw’Ebika ebyenjawulo, okukubiriza enkiiko z’Abataka era nga zino ziyambye abataka okutambulira awamu ssaako n’okuwangana amagezi ku nsonga ez’enjawulo.
Omutaka Kayiira era ateeseteese Ttabamiruka w’Abataka owa buli mwaka nebateesa ku nsonga enkulu n’okulambika abavubuka, okununula ettaka ly’ Ebika awamu n’okuwandiisa erikyasigaddewo mu mannya g’abayima lisobole okukuumibwa. Okulaakulanya ettaka ly’Ebika ne Puloojeekiti ez’enjawulo okuli okulima n’okulunda awamu n’emirimu emirala mingi.
Minisita Kiyimba yanyonyodde nti Beene bweyasiimye Omutaka w’ekika ky’ ekkobe Namwama Augustine Kizito Mutumba atandikirewo obuvunaanyizibwa buno obw’emyaka esatu.
Buno agenda ku butambuza awamu n’olukiiko olugenda okumuyambako nga luno lugenda kulangirirwa mu maaso awo.
Owek. Kiyimba yategeezezza nti Ssaabasajja era yasiimye nasisinkana abadde Omukubiriza Jjaja Kayiira Gajuule era namwebaza olw’emirimu gyakoze awamu n’obuvunaanyizibwa bwalina okulaba nga alambika bazzukulu be ab’ekika kye Mbogo.
Minisita Kiyimba yagambye nti Obwakabaka bwongera okusiima emirimu egikoleddwa Omutaka Kayiira Gajuule era bwatyo nayagaliza Omukubiriza omuggya Namwama Mulumba obuweereza obulungi eri Nnamulondo.