Bya Ssemakula John
Kampala
Munnakibiina kya National Resisitance Movement, Salim Uhuru, yeyasobodde okuwangulira ekibiina kye ekifo ky’obwammeeya wakati nga omuyaga gwa National Unity Platform (NUP) gugenda mu maaso nokukunta mubitundu by’eggwanga eby’enjawulo.
Mu kalulu akakubiddwa ku Mmande, Uhuru yeyawangudde obwammeeya bwa Kampala Central ate divizoni endala nezitwalibwa aba NUP.
Ebifo 56 ebilonderwamu byebyalonze abakulembeze ba Munisipaali ne divizoni omuli bammeeya ne bakkansala.
E Kampala Salim Uhuru owa NRM yafunye obululu 13114 nawangula owa NUP Hamudan Kigozi Ssemugoma eyakungaanyiza obululu 10654.
Charles Sserunjogi owa DP yakutte kyakusatu n’obululu 5318.
Bweyabadde ayogerako ne bannamawulire oluvannyuma lw’obuwanguzi buno, Uhuru yagambye nti buno buwanguzi bwamaanyi eri ekibiina kya NRM naddala mukaseera kano nga kumpi ebifo ku mitendera gyonna bitwaliddwa aba NUP.
“Kino kirabo eri ekibiina kya NRM, nze nga Uhuru ngenda kukolera wamu n’abantu bonna awatali kusosola ngatte ettofaali ku nkulaakulana y’ekibuga Kampala,” Uhuru bwe yasuubizza.
Mu divizoni za Kampala endala esatu aba NUP baziwangudde.
Mu divizoni ye Lubaga, Munnakibiina kya FDC Owek. Joyce Nabbosa Ssebugwawo yawanguddwa Zacchy Mberaze Mawula, ate e Makindye Ali Mulyanyama owa NUP neyeddiza entebe y’obwammeeya.
E Nakawa munnakibiina kya NUP Paul Mugambe yawangudde Bruhan Byaruhanga owa NRM ku bululu 32754 bwetyo NUP netwala ebifo ebyasinze.