Bya Yusuf Muwuluzi
Masaka -Buddu
Omubaka wa Pulezidenti e Masaka, Fred Bamwine, ayimiriza Imam w’omuzikiti omukulu e Masaka, Abbas Nseera oluvannyuma lw’obutakkaanya obwaliwo ku ntandikwa ya wiiki eno ekyavaako n’Abasiraamu okugajambula Omusiraamu Yasin Kakomo nga bamulumiriza okutunda emmaali y’Obusiraamu.
Ku Lwokubiri, Imam Nseera, yategeeza abasiraamu nga Kakomo bwe yali amutumidde omuntu ng’amulabula okumutta singa tamwesonyiwa.
Ekiragiro RDC Bamwine akiweeredde mu woofiisi ye mu lukiiko lw’ebyokwerinda lwe yayise omuli amagye, poliisi n’abakulembeze b’Obusiraamu olubadde mu woofiisi ye jjo ku Lwokuna. Ayimirizza n’omumyuka wa Imam ku muzikiti guno, Twaibu Kaweesi Maalo.
Bamwine agamba nti okusinziira ku kunoonyereza kwe baakoze baakizudde nti Imam n’omumyuka we baakibogwe era bw’atyo kwe kulagira disitulikiti Kadhi agira abazza ku bbali kuba Imam okwongera nti baagala kumutta, teyasooka kulowooza ng’omukulembeze
Awadde Kadhi amagezi bano abazzeeyo mu ttendekero ly’aba Imam bamanye engeri ensonga bwe zirina okukwatibwamu. “Woofiisi ya Imam etwalibwe Disitulikiti Kadhi wabula ba Imam musooke mubazimbe mu ngeri y’obukulembez, baleme okwabuluzaamu abasiraamu.” Bamwine bw’annyonnyodde. Bamwine alumiriza nti ku lunaku lwe baagoba Kakomo mu muzikiti mwalimu abatali basiraamu era ebyonna ebyaliwo byali bitegeke.
Kyokka Disitulikiti Khadi w’e Masaka , Swaibu Ndugga yeemulugunyizza n’agamba nti ensonga eno tekwatiddwa na bukugu kuba Imam Nseera yalondebwa mu lwatu. Shiekh Ndugga agamba nti obuzibu ku nsonga eno buva ku ttaka lye Ssembabule eryatundibwa nga Sheik Kakomo yeekobanye ne Mufti Mubajje era awakanyizza ne ssemateeka wa Old Kampala gwe baasomye okuyimiriza Nseera kuba bo b’e Kibuli.
Eyakiikiridde DPC w’e Masaka, Majidu Wepukulu , yasabye RCC akkirize era alagire n’abo Imam b’alumiriza okwagala okumutta, baleme kudda era naye kye yakkirizza.
Wabula abasiraamu ekyokuyimiriza Imam Nseera tekibawomedde era ne bennyamira olwa RCC Fred Bamwine okusalawo nga tamaze kubeebuuzaako.