Bya Ssemakula John
Kampala
Pulezidenti Yoweri Kaguta Museveni akakasizza eggwanga ng’abeebyokwerinda bwe bagoberera abatemu b’emmundu abagezezaako okutemula eyabadde Minisita w’ebyentambula, Gen. Edward Katumba Wamala.
Abatemu bano abatannategeerekeka bibakwatako babadde batambulira ku Pikipiki, ku makya g’Olwokubiri bakubye emmotoka ya Gen. Katumba Wamala amasasi okukkakkana nga muwala we, Brenda Nantongo ne ddereeva we battiddwa, Gen. Katumba ye n’asimattuka n’ebisago.
Ekiwandiiko Pulezidenti Museveni ky’afulumizzaawo, ategeezezza nti abantu bano bayise ‘Embizzi’ bagenda kubalondoola era bakwatibwe.
“Embizzi ezo ezitalaba mugaso mu bulamu zikubye Gen. Katumba amasasi n’afuna ebisago ate nezitta muwala we ne ddereeva we. Nsaasidde ab’enganda olwa bannayuganda bano abattiddwa.” Gen. Museveni bw’annyonnyodde.
“Njogedde ne Gen. Katumba emirundi ebiri ku ssimu. Abakugu baakumukolako. Tugenda kufufuggaza abatemu bano nga bwe tuzze tukola emabega kuba twatandise dda okufuna ebikwata ku batemu bano.”
Kinajjukirwa nti abatemu bano bazze batta abanene mu ggwanga mu myaka egiyise era bano ababeera batambulira ku Pikipiki bakubye emmotoka ya Gen. Katumba Wamala ey’ekika kya Land Cruiser e Kisaasi ku njegoyego za Kampala.
Emmotoka ekubiddwa amasasi ku njuuyi zombi era gano ge gasse muwala wa Katumba awamu ne ddereeva we.
Okusinziira ku mwogezi w’amagye, Brig Gen. Flavia Byekwaso, Gen. Katumba Wamala mu kiseera kino ali mu kujjanjabwa ku ddwaliro lya MediPal erisangibwa e Kololo.