Bya Ssemakula John
Kampala
Omukulembeze w’eggwanga Yoweri Museveni alabudde abasomesa balekere awo okumuteeka ku bunkenke nga batiisatiisa okwekalakaasa singa tebongezebwa musaala.
Museveni bino abyogeredde ku kisaawe e Kololo mu kujaguza olunaku lw’abasomesa mu nsi yonna ku Lwokubiri wansi w’omulamwa “Obukulu bw’abasomesa n’okuzza ebyenjigiriza ebikoseddwa COVID-19 engulu.”
Obwedda buli akwata omuzindaalo ng’alaajanira Pulezidenti Museveni okufaayo ku mbeera gye balimu era akkirize abongeze ku ssente z’omusaala kuba bafuna kitono nnyo.
Mu kwanukula Pulezidenti Museveni agambye nti akooye obunkenke obwabuli kadde n’okumutiisatiisa okwekalakaasa singa tabongeza ssente.
“Nali sirowooza nti abantu bennyini bayinza okufuuka ekizibu eri eggwanga lyabwe! Munoonya ki? Kati sisobola kukkiriza bya misaala minene ng’eggwanga lidda buzzi ngulu. Mukole byonna bye mukola okubanja emisaala. Naye temuyingirira nteekateeka yaffe ey’okusooka okulinnyisa emisaala gy’abasomesa ebya ssaayansi.” Museveni bw’agambye.
Ku mbalirira y’ebyenjigiriza entono, Museveni agamba nti bwe bateeka ssente mu by’okwerinda baba bateeka mu byanjigiriza, kuba abaana tebasobola kusoma nga tewali mirembe era okukakasa bino, awadde ekyokulabirako ku kiri e Nigeria, Somalia ne Congo, amasomero gye gaggalwa.
Museveni agambye nti ye nga pulezidenti afuna obusente butono nnyo naye tekimulemesa kukola ky’ateekeddwa kukola. Agambye nti kituufu omusaala omusava gwetaagisa, naye agenda kusooka kwongeza basomesa ba ssaayansi kubanga olwobugumu bw’ebintu bye basoma ne bye basomesa, tebasobola kwenkana n’abasomesa amasomo amalala.Ate ye Minisita w’ebyenjigiriza n’emizannyo, Janet Kataha Museveni agambye nti akadde kano ebitundu 60% eby’abasomesa be bagemeddwa naye abalala nabo beetaaga basitukiremu, amasomero gagende okuggulwawo nga buli omu agemeddwa.
Ssaabawandiisi w’ekibiina ekitaba abasomesa ekya UNATU, Philbert Baguma agambye nti gavumenti yeetaaga bunnambiro erowooze ku ky’okuwandiisa abasomesa abanaayamba ku mujjuzo ogugenda okubeera mu bibiina ng’abayizi bazzeeyo okusoma.
Baguma ajjukizza Pulezidenti Museveni obuwumbi 150 bwe yasuubiza abasomesa okubayisa mu Covid-19 nti ensimbi zino ziremeddeyo.
Ssaabawandiisi Baguma era asabye Pulezidenti Museveni okukola ku nsonga y’omusaala gw’ abasomesa oguzze gusuubizibwa okwongezebwa, kyokka ne kitakolebwa ate baleme kusosolamu ku basomesa ba ssaayansi n’abatali, naye basinziire ku buyigirize omuntu bw’alina.