Bya Miiro Shafik
Kampala – Kyaddondo
Omumyuka Asooka owa Katikkiro Owek. Prof. Twaha Kaawaase Kigongo atongozza ekitabo “Under the Wings of Prof. Dr. G.W Kanyeihamba” ekyawandiikiddwa eyali omuyambi we Alex Wavamunno.
Owek. Kaawaase ku mukolo guno yatumiddwa Ssaabasajja Kabaka Ronald Muwenda Mutebi II, era n’awerekerwako Ssaabawolereza wa Buganda Owek. Christopher Bwanika.
Mu kwogera kwe, Owek. Prof. Twaha Kaawaase Kigongo ategeezeza nti Prof. Kanyeihamba musajja ayayagala ennyo Kabaka Mutebi II ate era n’awagira nnyo n’Obwakabaka.
“Nga Obwakabaka bwa Buganda tuli basanyufu nnyo okubeerawo wano nga tutongoza ekitabo ‘Under the Wings ofProf. Dr. G.W Kanyeihamba’ ekiwandiikiddwa mu bigambo ebinyuvu era ebinyuma okusoma ekyawandiikiddwa Counsel Alex Wavamunno”, Owek. Kaawaase agamba ekitabo kino kikulu okujjukiza abantu omusajja, omu ku mpologoma batabani ba Uganda, Omuwandiisi, munnamateeka atawunyikamu eyayagala ennyo Ensi ye Uganda ate n’ayagala nnyo ne Ssaabasajja Kabaka Ronald Muwenda Mutebi II nga mukwano gwe nnyo, yayagala nnyo abantu ba Buganda era yasenga mu Buganda n’atuuka n’okuziikibwamu.
“Prof. Kanyeihamba yawagira nnyo Ssaabasajja Kabaka Ronald Muwenda Mutebi II n’Obwakabaka bwa Buganda mu ngeri nnyingi nnyo. Tujja kumujjukiranga nnyo nti mpologoma era munnamateeka ow’amaanyi” Owek. Kaawaase.
Wano yebazizza omuwandiisi w’ekitabo, Alex Wavamunno olw’ebigambo bye yawandiise ku Prof. Kanyeihamba nga abiggya ku ngeri gye yamutegeeramu ebbanga lye yamala naye. Ategeezeza nti kino kigenda kuyamba nnyo abantu obuteerabira Prof. Kanyeihamba n’ekyo kye yali.
“Tukwebaza okuba nti mu kitabo kino wawaddeyo essuula nnamba ey’omusanvu eyogera ku mukwano gwa Prof. Kanyeihamba ne Ssaabasajja Kabaka, weebale nnyo webalire ddala”, Owek. Kaawaase. Ayongedde n’asiima omutwe ogwaweereddwa ekitabo kino ng’agamba nti ddala Prof. Kanyeihamba kiwawaayiro kinene ekiwambagatidde abantu bangi, era wadde yafa naye ensigo ze yaleka a size zijja kwongera kumeruka nga eky’okulabirako ekisooka ye Alex Wavamunno.
Owek. Hon. Medard Lubega Ssegona y’omu ku beetabye ku mukolo guno, ono agamba nti ekitabo kino kiggyayo amakulu g’omuntu okwekkirirzaamu mu ki kyali, era yebazizza Alex Wava olw’okuwandiika ekitabo ekyoleka ebikwata ku mugenzi abalala okusobola okumuyigirako. Amwebazizza n’okutandika okuwandiika ebitabo ng’akyali muto. Ono asabye bannamateeka abato okufaayo okuyigira ku bantu nga Prof. Kanyeihamba era bemanyiize okunonyereza era babeere bavumu mu buli mbeera.
Ye Alex Wavamunno omuwandiisi w’ekitabo era nga yali muyambi wa Prof. Kanyeihamba, agamba nti ebintu bingi by’atadde mu kitabo kino ebikwata ku mugenzi abantu bye bagenda okuganyulwamu, omuli eddembe ly’okweyimirirwa n’ebirala. Asabye abantu bulijjo okukolera ebintu mu ngeri egoberera amateeka. Ategeezeza nti yawalirizibwa okuwandiika akatabo kano kubanga Prof. yamulera nnyo era n’alera eggwanga ebbanga lye lyonna ery’obulamu.