Bya Ssemakula John
Kampala
Poliisi y’eggwanga erangiridde nga bwekomezaawo ebikwekweto bya Fika Salama ku nguudo ez’enjawulo okufuuza emmotoka ne baddereeva abatalina bisaanyizo okulwanyisa obubenje obususse ku nguudo ez’enjawulo.
Kitegeerekese nti mu myezi 2 egiyise abantu 250 be bafiiridde mu bubenje obw’enjawulo. Ebikwekweto bya Fika Salama byaleetebwa ekitongole ky’ebyenguudo ki Uganda National Roads Authority(UNRA) mu 2016, poliisi y’ebidduka nebayambako okubiteeka mu nkola naddala ku nguudo zi Mwasanjala.
Bw’abadde ayogerako eri bannamawulire mu Kampala, omwogezi wa poliisi y’ebidduka, Faridah Nampiima ategeezezza nti obubenje buyitiridde nga kati basazeewo okubitukizza okuzuula baddereeva n’emmotoka ezitalina bisaanyizo.
“ Tuzizza ebikwekweto bya Fika Salama mu bitundu eby’enjawulo essaawa 24 mu nnaku zonna eza wiiki era tugenda kwongera neku basirikale baffe,” Nampiima bw’agambye.
Okusinziira ku Nampiima bagenda kusuula emisanvu mu bifo byebanokoddeyo ng’ebisinga okubaamu obubenje era bino tugenda ku bibeeramu okuva ku makya ppaka kumakya awamu n’okulawuna enguudo zino.
Ono annyonnyodde nti bagenda kuteeka amaanyi mu kufuuza abavuga endiima kuba bakizudde nti okusinga obubenje buva ndiima nakuvugisa kimama.
Nampiima agamba nti bagenda kuwa ebibonero ebyabuliwo weri abo abanagaana okuyimirira, abavuga nga batamidde, nabo abakola obubenje nebalumya abalala awamu nabo abayitiriza okumenya amateeka g’oku nguudo.
Poliisi etegeezezza nti bakukolagana n’abantu ba bulijjo awamu nokusomesa abantu ku ngeri gyebalina okukozesa amakubo.
Bino webijjidde nga alipoota ya poliisi eraga ng’obubenje bwebweyongedde bwogerageranya n’omwaka 2021 nga bulinnye ebitundu 42 ku buli 100 okusinga ku 2021. Eno alipoota eraga nti abantu 12 bebafiira mu bubenje buli lunaku ekintu eky’obulabe.