Bya Ronald Mukasa
Ggaba -Wakiso
Minisita wa Bulungibwansi, Obutondebwensi, Amazzi n’Ekikula ky’Abantu, Owek Hajjat Mariam Mayanja Nkalubo akulembeddemu abantu okukola Bulungibwansi ku mwalo gw’e Ggaba okutumbula eby’obuyonjo n’obulamu mukitundu kino okulaga okutandika kwa wiiki ya Bulungibwansi.
Oweek. Mariam akuutidde abatuuze okwetegekera ebiseera eby’omumaaso nga beyongera okulima emiti n’okulwanyisa okutyoboola obutondebwensi okusobola okutaasa ebiseera by’eggwanga eby’omu maaso.
Oweek. Nkalubo awaddeyo emiti egiwerako eri abatuuze bagisimbe okwongera okuddukirira omulanga guno.
Ono yeebazizza bannamikago ba Minisitule n’akunga abantu bonna okweyunira emikolo gino egitegekeddwa okukuza wiiki eno.
Mu nteekateeka eno, Owek. Mayanja awerekeddwako abakwanagaanya ba Minisitule eno omuli Muky. Teddy Nabakooza Ggaliwango, Mw. Dan Kitazze, Omulangira Ndawula Ssalongo, Omulangira Tonny Wasajja, Nakaayi Ritah, abakulembeze mu Bwakabaka ku mitendera egy’enjawulo bannabyabufuzi ab’enjawulo okuli Meeya wa Makindye Divizoni Muhammad Mulyanyama Kasirye ne ba kkansala.