Bya Ronald Mukasa
Soroti
Abantu bataano beebakakasiddwa okufiira mu kabenje enkya ya leero mu bitundu bye Soroti ku luguudo oluva e Amuria okudda e Soroti.
Kigambibwa nti emmotoka kika kya Loole Isuzu nnamba UAU 429R yalemeredde omugoba waayo oluvannyuma lw’okwabika omupiira.
Abeerabiddeko bagamba nti wano omugoba waayo yagezezaako okulwanagana nayo naye neemulemerera era bwetyo neyeesolosa mu mugga
Omwogezi wa Poliisi mukitundu kya East Kyoga, ASP Edison Obukulem agamba nti akabenje kano kaguddewo ku ssaawa 12 n’ekitundu ku makya era ku bafudde kubaddeko abasajja basatu n’abakyala babiri.
Afande Obukulem agamba nti bano tebanamanyika mannya wadde ebibakwatako wabula emirambo gyabwe gitwaliddwa mu ddwaliro ekkulu erya disitulikiti ye Amuria.
Poliisi era esinzidde wano neerabula abakozesa enguudo mu kitundu kino okuvuga n’obwegendereza kubanga zino zikoseddwa nnyo enkuba etonnya ensangi zino.