Bya Musasi Waffe
Kampala
Poliisi mu Kampala n’emiriraano erabudde abadigize wamu n’abategese ebivvulu mu ggandaalo lya Ssekukkulu, nti tebagenda kubikkiriza.
![](https://gambuuze.ug/wp-content/uploads/2020/12/Onyango.jpeg)
Omwogezi wa poliisi mu Kampala n’emiriraano Patrick Onyango yagambye nti balabye obulango ku leediyo, ttivvi n’omutimbagano, n’alabula abadigize n’abategesi nti anaakwatibwako agenda kukolwako.
“Tusomye era ne tuwulira n’okulaba ng’ebivvulu eby’enjawulo birangibwa mu bifo nga wooteeri, bbiici wamu n’ebisaawe. Tubeegayiridde temubitegeka.” Onyango bwe yagambye.
Onyango yannyonnyodde nti ebiragiro bya Minisitule y’ebyobulamu ku kirwadde kya Ssennyiga Corona naddala ku bivvulu bikyaliwo era abantu tebasaanye kubimenya.
“Amateeka agateekebwawo okutaasa abantu ku kirwadde kya Ssennyiga Corona gakyakola, twagala okulabula abategesi b’ebivvulu okwewala okumenya amateeka era bakomye okulanga ebivvulu.” Ono bwe yagasseeko.
Onyango yasabye abantu ssekinnoomu okuyambako poliisi nga balonkooma ekivvulu oba akabaga konna akamenya ebiragiro bya Ssennyiga Corona.
Bino we bijjidde nga wakyaliwo okukubagana empawa ku by’okuggulawo ebivvulu oluvannyuma lw’amawulire okusaasaana ku ntandikwa ya wiiki eno ng’ebivvulu bwe byakkiriziddwa wabula ne biteekebwa obukwakkulizo obwamaanyi.