Bya Ssemakula John
Kampala
Poliisi ekakasizza nga bw’ezzeemu okubuuliriza ku nfa ye yali omumyuka wa Ssaabaduumizi wa poliisi, Lt Gen. Paul Lokech.
Lokech eyayatiikirira ennyo ng’empologoma y’e Mogadishu olw’okufufuggaza abatujju ba Alshabaab mu Somalia, yafa mu August nga 21, era ebbaluwa y’abasawo yalaga nti ono okufa kwe kwava ku kwetukuta kw’omusaayi mu kakongovule akaava ku kigwo kye yafuna.
Bw’abadde ayogerako eri bannamawulire ku Mmande, omwogezi wa poliisi mu ggwanga, Fred Ennanga agambye nti Ssaabaduumizi wa poliisi yennyini, John Martins Okoth Ochola, ye yalagidde okubuuliriza kuno kuddemu oluvannyuma lw’abakulembeze ne bannabyabufuzi mu Acholi okwemulugunya ku kituufu ekyatta omwana waabwe.
“Ssaabaduumizi yatulagidde tuddemu okunoonyereza kubanga bannabyabufuzi mu Acholi omuli n’ababaka ba Palamenti , baali tebamatidde n’ebyo ebyabagambibwa mu kuziika, era wano we tusinzidde okuddamu okunoonyereza.” Enanga bw’agambye.
Enanga agambye nti alipoota eyafulumizibwa okusooka ku nfa ya Gen. Lokech yalaga nti okwetukuta kw’omusaayi gwamugenda mu mawuggwe, wabula ayongeddeko nti okunoonyereza okupya kugenda kwongera kutangaaza ku alipoota eyasooka okufumizibwa.
“Okunoonyereza kukolebwa tusobole okufuna ekifaananyi ekituufu era kimalewo okubuusabuusa abakulu b’e Acholi kwe balaga nga tugenze okuziika Gen. Lokech.” Enanga bw’agasseeko.
Enanga alabudde abantu abatandise okuteebereza ng’okunoonyereza kuno bwe kugendereddwamu nti byekuusa ku butwa awamu n’entalo nga ze zaavaako okufa kwe, by’agamba nti tebiriiko mutwe na magulu.
“Temuyamba baaluganda lwa mugenzi kuwona biwundu bibali ku mitima nga mwogera ebigambo ebitaliimu makulu, tulinde alipoota endala esooke efulume.” Enanga bw’alabudde.
Kinajjukirwa nti mu kuziika Lokech, abakulembeze n’ekibiina ekitaba ababaka ba Palamenti abava mu Acholi, baasaba bafune enyinyonnyola ematiza ku nfa y’omuntu waabwe.
Era wano Minisita w’ensonga z’omunda mu ggwanga era eyali akiikiridde Pulezidenti Museveni ku mukolo guno, Maj. Gen. Kahinda Otafiire yalabula abakungubazi okuggya eby’obufuzi mu nfa ya Lokech era beewale okusasamaza abantu n’okubakumamu omuliro.