Bya Stephen Kulubasi
Kampala
Bannamawulire ababadde bakwata amawulire ga Robert Kyagulanyi ne banne nga batwala ekiwandiiko ku kakiiko k’ensi yonna ak’eddembe ly’obuntu, bakiguddeko abapoliisi awamu n’amagye bwe babasazeeko ne batandika okubakuba era okukakkana ng’abawerako bafunye ebisago.
Bano babasaliddeko Kololo wabweru w’ekitebe kino wakati nga Kyagulanyi ne banne balinze abakulira akakiiko kano okubasisinkana babakwase ekiwandiiko kyabwe ekyemulugunya ku ngeri abantu baabwe ab’enjawulo gye bazze bawambibwa ab’ebyokwerinda abatambulira mu mmotoka ezimanyiddwa nga ‘Drone.’
Poliisi yasoose kusalako nguudo zonna ekituuka ku kitebe kino mu ngeri y’okunyweza eby’okwerinda era obwedda buli mmotoka esalimbira okumpi n’ekifo kino esooka kwekenneenyezebwa.
Kyagulanyi abadde awerekeddwako; omwogezi w’ekibiina Joel Ssenyonyi, Ssaabawandiisi Lewis Lubongoya, Omubaka Derrick Nyeko, Aloysius Mukasa awamu n’abalala.
Bannamawulire abalumiziddwa kuliko; Irene Abalo owa Daily Monitor, Josephine Makumbi owa NBS , Timothy Murungi owa New Vision ne John Cliff Wamala owa NTV.
John Cliff Wamala awamu n’abalala bafunye ebisago ku mutwe era balabiddwako nga bavaamu omusaayi ne baddusibwa mu malwaliro nga bali mu bulumi.
Abamu ku bannamawulire bategeezezza nti amagye ne poliisi bwe batuuse ne bakuba buli gwe basanze nga bwe babagamba nti we babadde wabadde walina kubaawo abantu basatu bokka nga kuno kuliko Kyagulanyi awamu n’abakungu b’ekibiina kye babiri.
Omubaka omulonde owa Makindye West, Derrick Nyeko y’omu ku balozezza ku bukambwe bwa poliisi, era ono n’emmotoka mw’abadde atambulira eyasiddwa endabirwamu y’omu maaso.
Nyeko avumiridde ebikolwa bya poliisi n’ategeeza nti babadde mu ddembe naye olw’okuba poliisi tekyalina nsonyi esazeewo okubakubira ne ku kitebe ky’ekibiina ky’ensi yonna ekikola ku ddembe ly’obuntu nga tebaliina musango.
Kino kiddiridde omwogezi wa poliisi mu Kampala n’emiriraano, Patrick Onyango, okuvaayo n’alabula Kyagulanyi ne banne obutagezaako kukung’aanya bantu era ne bamuwa abantu basatu bokka balina okutambula nabo okugenda ku kitebe kino.
Kyagulanyi yasinzidde ku kitebe ky’ekibiina kye eggulo n’akunga abantu ababuliddwako abaabwe okumwegattako olwaleero batwale ekiwandiiko ekiraga okwemulugunya kwabwe eri akakiiko k’ekibiina ky’amawanga amagatte akakola ku ddembe ly’obuntu.