Bya Ssemakula John
Kampala
Palamenti y’eggwanga etenderezza omulimu amakula ogwakolebwa abasawo mu ddwaliro ly’e Soroti olw’okukola obutaweera ne bagattulula abalongo wakati mu mbeera ey’okusoomoozebwa. Abasawo ku ddwaliro ekkulu e Soroti bakola ebyafaayo bwe baayawudde abalongo ng’omu yali amaze ebbanga lya mwezi mulamba ng’afudde oluvannyuma lw’okulongoosebwa mu nnyabwe mu disitulikiti y’e Amuria.
Omukyala Loyce Alinga, omutuuze ku kyalo Aojangor, mu ggombolola ya Obalanga mu disitulikiti y’e Kapelebyong, alumiriza eddwaliro ekkulu e Mulago okulemererwa okumubayamba bwe bagendayo okugattulula abaana bano.
Oluvannyuma bano baalongoosebwa mu ddwaliro ly’e Soroti.
Eggulo ku Lwokusatu, omubaka wa Kasilo mu Palamenti, Elijah Okupa, yaleese ekiteeso ekisiima Dr. Epodoi Joseph eyakulemberamu abakugu abalongoosa abalongo bano.
“Kikakafu nti Dr. Epodoi Joseph ne banne ku Soroti Regional Referral Hospital baalaga obumalirivu bwe balina ku mulimu, obukugu n’obumanyi era ne banywerera ku biragiro bye baakuba okulabirira obulamu bwa bannayuganda.” Okupa bwe yagambye.
Ekiteeso kino kyawagiddwa; omubaka Richard Oseku (Kibale County), Clement Ongalo(Kataki County), Patrick Okabe (Serere County), Hellen Ado(Serere Woman MP) ne Veronica Eragu (Kaberamaido County).
Ababaka baakukkulumidde abasawo b’e Mulago olw’okugoba omukyala ono eyali yeetaaga okuyambibwa.
“Singa omukyala yali munene mu ggwanga, omubaka oba ng’alina ssente, Ab’e Mulago bandimufudddeko ne bayita abakugu okumukolako.” Omubaka Musa Echweru bwe yennyamidde.
Ono yatabukidde ab’eddwaliro ly’e Mulago olw’okugoba Jjajja w’abaana bano olw’okuba baali baavu.
“Abasawo abaabaniriza e Mulago tebalina kya makulu kye baakola ku bayamba. Eddwaliro ly’e Mulago lyakaddaabirizibwa era lirina buli kimu naye mu ggwanga lino mukyalimu abasawo ng’okukola ku mulwadde asooka kumupima.” Bwatyo bwe yagasseeko.
Ate ye omubaka Gilbert Oulanya ne Francis Mwijukye, basabye abasawo e Mulago banoonyerezebweko ku by’okugoba jjajja w’abaana bano ne muwala we. Ababaka baasabye gavumenti okutereeza eby’obulamu mu ggwanga era batereeze n’emisaala gy’abasawo mu ggwanga lyonna.
Bano baagala amalwaliro wonna mu ggwanga gaddaabirizibwe okusobola okuwa bannansi eby’obujjanjabi ebigwanidde.