Bya Ssemakula John
Kampala
Palamenti olwaleero egaanye ebbago eribadde lireeteddwa okukolwamu amateeka agakwata ku by’entambula wamu n’enkozesa y’enguudo erya 2021. Singa liyise kyandibadde kitegeeza nti buli nnanyini mmotoka ajja kuba asasula ssente za layisinsi eza buli mwaka olw’okubeera n’emmotoka.
Okusinziira ku ssentebe w’akakiiko ka palamenti ak’ebyenfuna, Jane Avur, abantu okusasula omusolo guno kwandibadde ku basasuza musolo mulundi gwakubiri.
“Akakiiko kasaba gavumenti emisolo egiteeke ku bintu ebikozesebwa okutambuza emirimu, ennongoosereza zonna zigobebwe,” Omubaka Avur bw’annyonnyodde.
Singa ebbago lino liyise, buli mmotoka ebadde erina okusasula omutemwa gwa buli mwaka nga layisinsi okusobola okubeera ku kkubo.
“Omuntu tabeere na mmotoka, ttuleera oba okugivugira ku nguudo okuggyako ng’erina layisinsi nga ebbago lya ‘ Traffic and Road Safety Act’ bwe lirambika, ebimu ku bibadde mu bbago lino bwe bisoma.
Ensonga y’okusasuza abavuzi b’emmotoka layisinsi si mpya, emyaka egiyise emmotoka zaggyibwangako layisinsi era waliwo n’abazeekebejjanga okusobola okuzuula ezitannasasula naye ssente zino zaayimirizibwa, olwo omusolo guno ne guteekebwa ku mafuta olw’ensonga nti abasinga baali bagwewala.