Bya Francis Ndugwa
Bulange – Mmengo
Omumyuka Ow’okubiri owa Katikkiro Owek. Robert Waggwa Nsibirwa asisinkanye bannamakolero ab’enjawulo nabasaba bulijjo okubaako kyebaddiza Obuganda era bawagire enteekateeka ez’enjawulo zebulina.
Okusaba kuno Owek. Waggwa akukoledde ku Bulange e Mmengo ku Lwokubiri bannamakolero ne Bannakawempe ab’eggombolola ya Mutuba V bwebabadde bagenyiwaddeko embuga mu nteekateeka y’Oluwalo.
“Kirungi nnyo nti amakampuni gano gakitegedde nti wadde gakola ebintu ebyenjawulo omuli amazzi, omwenge, amatafaali n’ebirala babiguza abantu ba Buganda nebabifiira kyebiri nga n’olwekyo okuleeta oluwalo kuba kuzza muzigo. Obwakabaka bulina emiramwa esatu okukuuma ennono n’obuwangwa bwaffe, Ssaabasajja ayagala okutumbula embeera z’abantu be babeere bulungi, eky’okusatu kwekufuna ennyingiza esobola okuwanirira emiramwa ebiri egisoose,” Owek. Nsibirwa bw’ategeezezza
Owek. Waggwa abasabye okwekwata ku Buganda mu nkola ey’omukago kuba erina abantu n’akatale nga singa bakwatagana bajja kufuna akatale ate ne Buganda esobole okudda ku ntikko.
Owek Waggwa yeebaziza bannamakolero bano abakiise embuga olw’okufaayo okubaako ettofaali lyebagatta ku nkuulakula ya Buganda .
Minisita omubeezi avunaanyizibwa ku gavumenti ez’ebitundu, Owek. Joseph Kawuki ategeezezza nti ekikoleddwa kirungi kuba enteekateeka eyabasikiriza okujja okukolera wano amakolero yazimbibwa Abaganda abasooka ate nga n’emirimu egikolebwa nga obujjanjabi bibagasa.
Ye omwami wa Kabaka atwala Eggombolola ya Mutuba V Kawempe era akulembedemu kampuni zino, Benon Ntege ategeezeza nti baruubiridde kwongera kusakira Bwakabaka mikwano ne bannamikago kisobozese emirimu okutambula .
Bannamakolero abakiise embuga kubaddeko Antonet Agro. Engineering Co. Ltd, Haris International, Hema Beverages ne Rio Alliance Construction Co. Ltd.