Bya Stephen Kulubasi
Bulange -Mmengo
Minisita wa bavubuka, ebyemizannyo n’okwewummuzaamu mu Bwakabaka bwa Buganda, Owek. Henry Ssekabembe Kiberu, asabye abavubuka ba Buganda okugenda e Mmengo mu bungi olunaku lwenkya, baweeyo omusaayi bayambe ku bagwetaaga.
![](https://gambuuze.ug/wp-content/uploads/2021/03/vlcsnap-2021-03-31-10h48m30s492-1024x576.png)
Owek. Ssekabembe agambye nti abantu abatasobodde kugenda Mmengo mu nnaku zino ezasoose, basobola bulungi okugaba omusaayi olunaku lw’enkya.
Bino Minisita Ssekabembe abyogeredde mu Bulange bw’abadde yeetabye mu kugaba omusaayi era n’akunga abavubuka mu bibiina ebyenjawulo okuvaayo bajjumbire.
Owek. Ssekabembe yabadde omugabi w’omusaayi omukulu olunaku lwaleero era yeebazizza abavubuka olwokuvaayo mu bungi ne bagaba omusaayi. Wano w’asinzidde n’asaba abavubuka okujjumbiranga buli Ssaabasajja lw’asiima Obuganda okwetaba mu nsonga ez’ekikula kino, kubanga abavubuka be balina okuba abasaale mu nteekateeka za Buganda.
Olunaku lw’enkya, Omulangira David Kintu Wassajja, y’agenda okuba omugabi w’omusaayi omukulu era aggalewo enteekateeka eno eyawomebwamu omutwe, ekitongole kya Kabaka Foundation, Nakasero Blood Bank ne Red Cross.
Leero abavubuka b’ekibiina kya Nkobazambogo okuva ku Ssetendekero wa Makerere ne Muteesa 1 awamu n’abakozi ba CBS ne BBS Terefayina, nabo beenyigidde mu nteekateeka eno okusobola okuyamba ku bantu abagwetaaga.
Akulira entambuza y’emirimu ku BBS Terefayina, Steven Dunstan Busuulwa, annyonnyodde nga bwe waliwo obwetaavu bw’okumalawo ebbula ly’omusaayi nga kibadde kibakakatako nga Terefayina okwetaba mu nteekateeka eno.