Bya Ssemakula John
Ndeeba – Kyaddondo
Omumyuka Ow’okubiri owa Katikkiro, Owek. Robert Waggwa Nsibirwa asabye Abaami b’Amasaza okwongera okunnyikiza ennono n’obuwangwa mu bantu be bakulembera kibayambe okwongera okulaakulana ne Buganda esobole okudda ku ntikko.
Okusaba kuno Owek. Nsibirwa akukoledde ku Pope Paul Hotel mu Ndeeba bw’abadde aggalawo Olusirika lw’Abaami b’Amasaza ku Lwokusatu wansi w’omulamwa gw’okwolesa Federo y’Ebikolwa mu masaza ga Buganda.
Owek. Waggwa Nsibirwa Abaami bano abasabye okutuukiriza obuvunaanyizibwa bwabwe nga boolesa Federo y’ebikolwa okusobola okusalira ebizibu by’abantu be bakulembera amagezi kibayambe okutumbula embeera zaabwe.
Minisita Nsibirwa agumizza Abaami bano nti enteekateeka z’Obwakabaka nnyingi nga zonna zitunuulidde enkulaakulana mu bantu ba Kabaka nga bwekityo balina okuzaagazisa abantu.
Ono anokoddeyo enteekateeka ez’enjawulo omuli ez’okuzimba ebisaawe by’omupiira mu masaza ag’enjawulo kiyambe okwongera okutumbula ebitone kuba kizuuse nti empaka z’Amasaza ga Buganda zikuze ebitagambika.
Bw’abadde mu Lusirika luno, Omukubiriza w’Olukiiko lw’ Abataka Nnamwama Augustine Kizito Mutumba abanjulidde obutabo buna obwakoleddwa Abataka abakulu ab’obusolya nga bulimu ennambika empya egenda okugobererwanga mu kwabya olumbe era anaasesetuka naava ku nnambika eno ajja kuba akola bibye ng’omuntu.
Omutaka Namwama ategeezezza nti mu nkola eno mpaawo kuddamu kwabya lumbe n’okulaga omusika amangu ddala nga okuziika kuwedde okuggyako nga wayiseewo emyezi mwenda n’enkola endala nga bwalambulula.
Abaami Bamasaza abeetabye mu ttabamiruka ono baweze okuddayo okuteeka Federo ey’ebikolwa mu nkola basobole okukulaakulanya abantu baabwe ne Buganda.
Ensisinkano eno yeetabiddwamu Abaami b’amasaza ag’enjawulo, Abamyuka baabwe, ne ba Nnampala baabwe era bafunye okubangulwa okuva mu bakugu ab’enjawulo.