Bya Ssemakula John
Bulange – Mmengo
Abadde minisita w’ Obwakabaka ow’ebyenjigiriza , eby’obulamu, embeera z’Abantu era avunaanyizibwa ku oofiisi ya Nnaabagereka, Owek. Dr. Prosperous Nankindu Kavuma yeebazizza Ssaabasajja Kabaka Ronald Mutebi II olw’okumufuula omuntu ow’enjawulo.
Owek. Nankindu bino abyogeredde mu Bulange e Mmengo ku Mmande bw’abadde akwasa minisita omuggya Owek. Owek.Cotilda Nakate Kikomeko woofiisi asobole okutandika emirimu mu butongole.
Owek. Dr. Prosperous Nankindu Kavuma asinzidde wano neyeebaza Empologoma olw’okumuwa omukisa okumuweereza era agamba nti yenyumiriza mu bbanga lyamaze nga aweereza kubanga obulamu bwe tebusigadde kyekimu.
Owek.Nankindu ategeezezza nti obuvunaanyizibwa bw’abadde nabwo kumuyambye okugatta ettofaali ku bulamu n’okumufuula ow’enjawulo.
Mungeri yeemu yebaziza abaweereza bazze akola nabo mu lugendo lw’obuweereza bwabaddemu abamuyambye ennyo okutuukiriza obuvunaanyizibwa Beene bweyamukwasa.
Ono aweze okusigala nga muwulize eri Nnamulondo n’okuyambako mu lutalo lw’okuzza Buganda ku ntikko.
Minisita omuggya Owek.Cotilda Nakate Kikomeko, atendereza obumannyirivu namaanyi Minisita Nankindu gataddemu mu kiseera kyabadde mubuweereza era aweze nti wakukola obutaweera okulaba nga atwala omulimu guno mu maaso.
Abamu ku baweereza Owek.Nankindu babadde akola nabo bamwebaziza olw’obuweereza obulungi obubayambye okutuukiriza obuvunaanyizibwa bwabwe ate nokusitula ekisaawe ky’ebyenjigiriza n’ebyobulamu mu Buganda .
Bano era basabye Omutonzi yababeera omulung’amya omukulu owa Minisita omuggya asobole okutwala abantu ba Buganda ne Uganda mu maaso.