![](https://gambuuze.ug/wp-content/uploads/2021/10/ffgfgf-300x192.png)
Bya Ssemakula John
Kampala
Akulira oludda oluwabula gavumenti, Owek. Mathias Mpuuga asabye abantu okuyambako ab’ebyokwerinda okulwanyisa obutujju mu ggwanga wabula n’abalabula obutakkirizibwa kukozesebwa gavumenti okuyigganya abagivuganya.
Bino Mpuuga yabyogeredde mu lukung’aana lwa bannamawulire ku Palamenti bwe yabadde ayogera ku nsonga z’abatujju abatandise okutega bbomu ezisaanyizzaawo obulamu bwa bannayuganda.
“Twagala okulabula bannansi okwewala embeera ya gavumenti okubakozesa nga bwe twalabye omukyala akola mu bbaala y’e Komamboga bwe yabadde agamba nti abaalumbye baabadde bambadde enkoofiira za People Power. Kino kya bulabe era abawangaalidde wano tumanyi gavumenti eno bw’ekolamu. Noolwekyo mwewale okubakozesa.” Mpuuga bwe yannyonnyodde.
Kino kiddiridde bbomu enkolerere okubwatuka e Kampala n’etta omuwala Emily Nyinaneza, ate endala n’ebwatukira mu bbaasi ya Swift eyali eva e Kampala okudda e Bushenyi era n’efiiramu omuvubuka Isaac Matovu e Lungala mu Mpigi.
Okusinziira ku b’ebyokwerinda obutujju buno bukolebwa abayeekera ba ‘Allied Democratic Forces (ADF) wabula Mpuuga yeebuuza lwaki ab’ebyokwerinda okulabula okwakolebwa Bungereza ku nsonga eno tebakutwala nga kukulu ne basobola okwetegekera embeera eno.
Owek. Mpuuga abantu abasabye okukolagana obulungi ne poliisi era baweeyo amawulire ago amatuufu era beewale okukozesebwa.
Era alabudde gavumenti obutagezaako kusiba butujju buno ku bantu abagivuganya wabula bakuume bannayuganda kuba bali mu kutya nga beetaaga okukakasa nti gavumenti eri mu buyinza ekyasobolerera ddala okubawa obukuumi.