Bya Ronald Mukasa
Bulange – Mmengo
Mukuumaddamula Charles Peter Mayiga akuutidde abavubuka okunyweza obuntubulamu era bakozese bulungi ebiseera byabwe basobole okubeera ab’omugaso.
Obubaka buno, Kamalabyonna Mayiga abuweeredde mu nsisinkano n’abakulembeze b’abayizi okuva ku Ssetendekero wa Makerere abakiise embuga ku Lwokusatu okuwagira enteekateeka z’emisinde gya mazalibwa ga Kabaka.
Katikkiro Mayiga akunze abayizi bano okwerinda ekirwadde kya Mukenenya nga bakola ekyo ekituufu, mu kifo ekituufu era mu kipimo ekituufu basobole okufuna obulamu obweyagaza.
Bano era Kamalabyonna abeebazizza olw’okuwagira emisinde gy’omwaka guno era nabasaba okukola ennyo basobole okuvaamu abantu ab’obuvunaanyizibwa .
Eyakuliddemu abayizi bano era omukulembeze wabwe ku Ssettendekero ono, Lubega Vincent Nsaba aweze okwongera amaanyi mukulwanyisa Mukenenya era nakunga bayizi banne mu matendekero agenjawulo okwerinda sirimu.
Eyaliko omukulembeze w’abayizi bano, Maseruka Robert yeebaziiza katikkiro olw’okukkiriza okubasisinkana namwebaza olw’okulambika obulungi abavubuka.
Ensisinkano yeetabiddwamu Minisita Israel Kazibwe Kitooke n’omukwanaganya w’Abavubuka mu Minisitule ebatwala mu Bwakabaka, Owek. Hassan Kiyemba wamu n’abakungu abalala.
Abayizi bano baguze emijoozi gya nsimbi eziweredde ddala emitwalo 80 okuwagira enteekateeka eno.