Bya Ssemakula John
Kazo – Kyaddondo
Omumyuka wa Katikkiro asooka Prof. Twaha Kaawaase Kigongo atabukidde bannakigwanyizi abeesomye okumalawo ettaka lya Buganda nabasaba okweddako kuba nebwebanakola ki Buganda lwazzi nga weeri, yakubaawo nabanajja bajja kulisangawo.
Bino Kaawaase abyogeredde Kazo Nabweru mu Wakiso ku mukolo bannamikago okuli IREAD ne Rotary kwebakwasiriza Obwakabaka essomero omugenda okusomera abaana abato ab’emyaka 0-5 okusobola okutumbula ebyenjigiriza mu Buganda.
” Tukyogera lwattu nti Buganda lwazzi terina gyeraga n’ettaka bagezaako bugeza okulibba, okuggyako nga balitutte ku mwezi naye lijja kusigala wano era nebwebuliba ddi, atutte ettaka ly’Obwakabaka mu makwettu lijja kutuddira, ” Owek. Kaawaase bw’annyonnyodde.
Owek. Kaaawaase abaagala okukozesa ettakab lya Buganda abawadde amagezi bakozese amakubo amatuufu agaateekebwawo Ssaabasajja Kabaka era nategeeza abantu mukitundu kino nti ettaka lyawo Beene yaliwaayo okutumbula ebyenjigiriza.
Owek. Kigongo agamba nti ekifo awazimbidwa essomero lino okuva nga akyali Minisita w’ ebyenjigiriza e Mmengo waliwo abantu ababadde bagezaako okulibba okulemesa enteekateeka y’okuteekako amasomero ag’enjawulo.
Ate Minisita avunaanyizibwa ku byenjigiriza n’embeera z’abantu mu Buganda, Owek. Dr. Prosperous Nankindu Kavuma ategeezezza nti kyasanyu okulaba nti omulimu guno ogwatandike n’okussa omukono ku ndagaano nga guwedde mu myezi esatu zokka.
Ye Gavana wa Rotary mukitundu kino John Magezi Ndamira agamba nti baagala okuyambako okuzimba obwongo bw’ abaana bano basobole okusoma obulungi ku mutendera gwa Pulayimale era nasiima Ssaabasajja Kabaka olw’enkolagana ennungi gyeyateekawo.
Ssentebe we Kyalo Kino Kiyimba Nathan aweze nga bwebagenda okukuuma ebintu bino era nakolokota bannabyabufuzi abazingamya enkulaakulana nga ezze mukitundu kyabwe.
Essomero lino Minisita Owek. Nankindu Kavuma yalikwasiza omumyuka asooka owa Katikkiro abadde akiikiridde Kamalabyonna ku mukolo guno.