Bya Ssemakula John
Najjanankumbi
Mmeeya wa divizoni ye Lubaga Oweek. Joyce Nabbosa Ssebuggwawo, alondeddwa okubeera pulezidenti w’ekibiina ki Forum for Democratic Change (FDC)oluvanyuma lwa pulezidenti Patrick Oboi Amuriat okugenda avuganye banaakwatira ekibiina bbendera ku bwapulezidenti.
Kino kilangiriddwa omumyuka w’omwogezi w’ekibiina ki FDC John Kikonyogo, bwabadde ku mukolo gw’okuzzaayo empapula okuva mwabo abagala okwesimbawo ku bwapulezidenti.
Kikonyogo yategeezezza nti, nabadde ssentebe w’ekibiina Wasswa Biriggwa alagiddwa okudda ebbali asobole okwesimbawo mu kamyufu k’ekibiina.
Bwabadde azzaayo empapula ze, Amb. Wasswa Biriggwa yategeezezza nga bwalina essuubi nti bannakibiina bagenda kumulonda abakwatire bbendera mu kalulu ka 2021.
Biriggwa agamba yeetegese okukola singa bannayuganda banaaba bamulonze okubeera pulezidenti wabwe.
Yasuubizza okutandikira ku kutumbula tekinologiya n’amagezi aga sayansi era abikozese okuyamba abavubuka okwefuna emirimu, kiyambe n’okulaakulanya eggwanga.
Biriggwa yeeyamye mu nnaku ze ekikumi ezisooka okuwa buli maka ssente emitwalo 10 zibayambe okweyimirizaawo kubanga ebyenfuna olwa COVID-19 bwatyo nasuubizza n’okuwa abavubuka ssente z’entandikwa bakyuse obulamu bwabwe.
“Bwenafuuka pulezidenti njakuba okulaba nga abayizi abatikkirwa bafuna emirimu. Abaana abamaze okusoma kati baddayo mu maka g’abazadde babwe bebabalabirira, ensi engagga nga Uganda eremwa etya okufunira abantu baayo emirimu?,” Birigwa bweyabuuzizza.
Amb. Biriggwa yategeezezza nti agenda kutandikira ku kukyusa bya bulimi, alabe nga abantu balima ebintu ebimala ate abayambe okubifunira akatale wamu n’okuzzaawo ebibiina by’obwegassi gavumenti ya Museveni byeyajjawo.
Ate yye Eng. Patrick Amuriat yagambye nti, alina ebisaanyizo byonna era nga taliko nziro yonna nasaba ekibiina kimwesige kubanga yasobola okuwa Uganda ebiseera eby’omumaaso ebyeyagaza.
Yasuubizza okukyusa eby’enjigiriza kubanga obukugu abulina kuba omusomesa omutendeke.
Yagambye nti bwanawangula obwapulezidenti wakuwa buli muyizi wa sekendule ekyuma ki Kompyuta kubanga ensi kati etambulira ku magezi ga sayansi ne tekinologiya.
Amuriat yagambye nti nebwanaaba tawangudde kalulu kano agenda kuwagira anabeera awangudde basobole okutwala eggwanga n’ekibiina mu maaso.
Akulira akakiiko k’ebyokulonda mu FDC Toterebuka Bamwenda yasabye bano bombi okukuuma ekifananyi ky’ekibiina mu byonna byebakola.