Bya Gerald Mulindwa
Mmengo
Omumyuka Ow’okubiri owa Katikkiro Owek Robert Waggwa Nsibirwa ayanjudde boodi empya eya kkampuni ya Namulondo Investments Limited leero ku Lwokubiri e Bulange – Mmengo.
Boodi eno egenda kukulirwa Omuk. Fredrick Mutebi Kitaka nategeeza nga eyali Ssentebe Dr. Robin Kibuuka bweyasaba Beene okumukkiriza okugenda emitala w’amayanja okubaako byamaliriza.
“Omukulu ono y’oomu ku batandika kkampuni ya Qualitiy Chemicals e Katwe eyatundanga eddagala ly’ebirime n’ebisolo ate era y’omu ku batandisi ba Cipla Quality Chemical Industries Limited gyemumanyi obulungi ekola eddagala lya Mukenenya n’omusujja gw’ensiri,” Nsibirwa bwanyonyodde
Nsibirwa yalaze nga bwebasuubira Namulondo okubaako wetuuka olw’ obukugu bwa Ssentebe Mutebi .
Omukungu Mutebi agenda kumyukibwa Dr. Ian Ssenkatuuka nga ono mukugu mu kukuba pulaani n’okuteekerateekera ebibuga ate nga mukiseera kyekimu musomesa ku Ssettendero wa Makerere.
Abalala abatuula ku boodi eno ye; Omutaka Kibondwe, Omukungu Ssebuufu, Omuk. Lilian Nankulu wa Namulondo Investments Limited, Oweek. Mutaasa Kafeero, Omuk. John Baptist Kitenda n’ Omuky. Lubwama.
Oweek. Nsibirwa ategeezezza nga Obwakabaka bwebweyama okuzimba ebizimbe 2 ebinene buli mwaka era nga omwaka guno bazimbye ekizimbe Ndiwulira ku ggombolola e Makindye wamu n’ekirala ku Ssaza e Kasangati.
Mu kwogera kwe, Ssentebe Omuggya Fredrick Mutebi Kitaka, yeebazizza Ssaabasajja Kabaka ne Katikkiro olw’okumulengera naweebwa obuvunanyizibwa buno.
Omuk. Mutebi yeeyamye okukola obuvunaanyizibwa buno n’amaanyi ge gonna era nasuubizza okwongerayo kkampuni ya Namulondo.
Kinajjukirwa nti, Nnyinimu Ssaabasajja Kabaka asiima nalonda abanakulira boodi eno nabawa ekisanja kya myaka esatu, Beene asobola okusiima nayongera gwalonze ekisanja wadde tasussa myaka 6 nga awereza.