![](https://gambuuze.ug/wp-content/uploads/2020/08/Unknown.jpg)
Bya Musasi Waffe
Kampala
Omuyizi Hillary Humphrey Kaweesa, ali mu luwummula lwa siniya ey’omukaaga anonye empapula ku kakiiko k’ebyokulonda avuganya ne puleziddenti Museveni mu kalulu ka 2021.
Ono wa emyaka 19, era nga yabadde asomera ku Mengo Secondary School mu Kampala.
Bweyabadde ayogerako eri bannamawulire oluvanyuma lw’okufuna empapula ku Lwokuna, Kaweesa yategeezezza nti abadde mukulembeze w’abayizi okuva lweyatandika okusoma era nga okulonda kuno ku muwadde omukisa okuweereza ku ggwanga lye.
“Nina ebisaanyizo byonna, ndi mukulembeze mulungi ate nga ekisinga obukulu ndi munnayuganda,” Kaweesa bweyategeezezza.
Kaweesa yagambye nti e Mmengo ku ssomero, abadde abudabuda bayizi banne era nga bweyatuula ebibuuzo yayita amasomo asatu mu bibuuzo bya S.6 nga n’olwekyo akkirizibwa okuvuganya ku bwapulezidenti.
Kinajjukirwa nti, palamenti yaggyawo ekkomo ly’emyaka 75 omuntu kwakkirizibwa okwesimbawo nga kati yenna awezezza emyaka 18 abeera asobola bulungi okuvuganya.