Bya Ssemakula John
Mpigi – Mawokota
Jjajja Omutaka omukulu ow’ekika ky’Omutima omusagi, Eng. Allan Nakirembeka Waliggo agumizza abazzukulu abasibibwa mu makomera ku nsonga z’ebyobufuzi okusigala nga bagumu era n’asaba Katonda okukyusa embeera.
Obubaka buno, Omutaka Nakirembeka abuweeredde ku dduwa y’omugenzi
Hajji Abdunoor Mayanja Lukabazi eyategekeddwa abaana b’ e Mpigi mu Mawokota okwebaza Katonda olw’ebirungi bye yamukozesa.
“Omalirewo ddala okulaajana kw’abazzukulu baffe abayigganyizibwa n’eryanyi erisukkiridde oboolyawo olw’ensonga ezitategeerekeka. Twesigira ddala obuzira bwo ayi Mukama otutaase ku abo abatwewerera okutubetenta ng’ababetenta emisota.” Omutaka Nakirembeka bwe yagambye.
Okusinziira ku mutaka Nakirembeka abaana ba Buganda bangi bavundira mu makomera kyokka n’ensonga ezibatwazaayo tezitegeerekeka.
Omutaka Nakirembeka aliko essaala ey’enjawulo gyasabidde Buganda n’awanjagira Katonda ataase ettaka lyayo ku bannakigwanyizi abeesomye okulitwala kuba ettaka Buganda ly’ebanja lyayo era Katonda ye yagiriwa.
Eng. Nakirembeka asabye ababaka ba Palamenti obutava ku mulamwa mu biteeso bye baleeta mu lukiiko naye mu buli kye bakola bafube okukulembeza amasomero kuba akaseera kano eggwanga liri mu matigga.
Omwami wa Kabaka akulembera essaza Mawokota, Kayima Gabriel Kabonge asabye abakulu mu gavumenti okwongera obukuumi eri bannansi kuba obunkenke buyitiridde mu ggwanga ng’abantu balemwa okukola obulungi emirimu gyabwe.
Ono era yeebazizza abaana olw’okwebaza kitaabwe ng’akyali mulamu n’ategeeza nti bangi kino balwawo okukikolera bakadde baabwe naye bano abaana banjawulo.
Eyakulembeddemu abaana b’omugenzi Hajji Abdunoor Mayanja Lukabazi, Umar Magezi yeebazizza kitaabwe olw’okuleka omukululo era ne yeeyama ku lwa banne okukuuma erinnya lya Kitaabwe.