![](https://gambuuze.ug/wp-content/uploads/2020/07/Yunis-1024x575.png)
Omuntu omu akakasiddwa okuba nti afudde ekirwadde kya Coronavirus mu Uganda oluvannyuma lw’emyezi ena ng’obulwadde buyingidde mu ggwanga.
Akakasiddwa ye Yunis Chamatala owe myaka 34 eyafiiridde eggulo mu ddwaliro lya Joy Hospice Center mu disitulikiti y’e Mbale.
Dr. Joyce Moriku Kaducu, minisita omubeezi avunaanyizibwa ku by’obujjanjjabi obusookerwako yategeezezza nti sampolo ezaggyiddwa kwono zaalaze nti abadde n’obulwadde bwa Covid.
![](https://gambuuze.ug/wp-content/uploads/2020/07/Yunis-2.png)
“Kakati tuli mukunoonyereza okulaba oba abadde n’obulwadde obulala obuyinza okuba nga bwebwamuviiriddeko okufa, naye kkyo kikakasiddwa nti abadde ne Covid,” Kaducu bweyagambye.
Omugenzi yaweebwa ekitanda mu ddwaliro lya Joy Hospice Center e Mbale nga aggyibwa mu distulikiti ye Namisindwa.
Ono yalina obubonero bw’ekirwadde kya Covid-19.
Omugenzi Munnansi wa Kenya kyokka nga yafumbirwa Munnayuganda.
Abatwala eby’obulamu e Mbale eggulo baalagidde abasawo 16 n’abantu abalala30 abateeberezebwa okuba nti baasemberedde ku mugenzi okuteekebwa mu kalantiini.
Isaac Wepondi, akulira eby’obujjanjjabi mu kibuga ky’e Mbale yagambye kati bali mu kaweefube wakuzuula buli muntu yenna eyatuukirirako omugenzi ng’ali mu ddwaliro kyokka nasiibulwa.
Wepondi yagasseeko nti buli mulwadde mu ddwaliro lino naye waakuteekebwa mu kalantiini okumala ennaku 14 okukizuula nti ddala talina Covid-19.
Okusinziira ku kitongole ekitwala eby’obulamu mu nsi yonna ekya World Health Organisation, abantu 15,000 bebaakafa ekirwadde kino mu Africa nga Uganda, Eritrea ne Seychelles zeezokka ezibadde tezinnafirwa muntu.