Bya Ssemakula John
Bulange
Omumbejja Joan Nassolo olwaleero yeegasse ku bantu ab’enjawulo abavuddeyo okugaba omusaayi kisobozese okutaasa obulamu bw’abo abagwetaaga.
Omumbejja asinzidde mu Bulange n’akowoola abavubuka okuvaayo bagambe omusaayi kuba ekirwadde kya Ssennyiga Corona kitaataaganyiza embeera oluvannyuma lw’amasomero okuggalwa mu mwezi Gwokusatu.
“Omusaayi okusinga gwavanga mu baana b’amasomero agaggalwa okuva mu mwezi Gwokusatu ate abalala abaawangayo, entambula yakalubamu.” Omumbejja Nassolo bw’agambye.
Wano w’asabidde abantu abakyasobola okutambula, okujjumbira okuwaayo omusaayi kitaase obulamu bw’abalala.
Minisita Nankindu nga y’ayanirizza Omumbejja Nassolo, asabye abavubuka okulabira ku mumbejja bayambe abali abalwadde bannalubiri, abakyala abazadde, abafunye obubenje wamu n’abantu abalala bonna abeetaaga omusaayi.
Abalala abagabye omusaayi kubaddeko Minisita Nankindu, Omuk. Adrian Mukiibi wamu n’abantu abalala.
Omukungu Ndagala, olunaku lw’eggulo yategeezezza nti enteekateeka eno yaakumala ennaku 4, ng’erimu ebitongole ebirala okuli ekya Kabaka Foundation nga bayambibwako aba Indian Association, Mengo Hospital, Uganda Blood Bank ne Uganda Red cross.