Bya Ssemakula John
Kampala
Omuloodi wa Kampala Erias Lukwago ayolekedde okulangirirwa nga Loodimmeeya omulonde ow’ekibuga Kampala nga mu lwokaano addirirwa Nabilah Naggayi Ssempala ow’ekibiina kya National Unity Platform (NUP).
![](https://gambuuze.ug/wp-content/uploads/2021/01/Lukwago.png)
Ebiva mukulonda biraga nti ku bifo eby’enjawulo awalonderwa Erias Lukwago akubidde waggulu mubitundu nga Lubaga, Makindye, Kawempe awamu n’awalala.
Ono banne abalala bwebavuganya okuli Daniel Kazibwe amanyiddwa nga Ragga Dee ne Joseph Mayanja amanyiddwa nga Jose Chameleone, olwokaano terubatambulidde bulungi.
Oluvannyuma lw’okulonda okukomekerezebwa era obululu nebutandika okubalibwa, abawagizi ba Loodimmeeya Erias Lukwago batandise okujaganya olw’ omuntu waabwe okulembera olwokaano luno.
Bano okuli; abavuzi batakisi, ababoodabooda, abatembeeyi n’abantu abalala abagamba nti Lukwago abadde abalwanirira balabiddwako ku nguudo za Kampala nga bajaganya olw’obuwanguzi buno.
E Nateete mu Mackay Zzooni, abawagizi ba Lukwago balabiddwako nga batambula n’empapula wamu ne kkalaamu nga bawandika obululu bwa Lukwago mubifo eby’enjawulo awalonderwa.
Ku kifo awalonderwa ekya Njovu mu zzooni ya Lubya, Erias Lukwago afunye obululu 433 naddirirwa Nabilah n’obululu 161. Daniel Kazibwe nafuna obululu 42 ate Chameleone nafuna obululu 36 so nga Charles James Ssenkubuge afunyewo akalulu 06.
Nakivubo Blue, Lukwago afunye obululu 305 ate Nabilah Naggayi afunye obululu 53, Kazinwe afunye 22, Joseph Mayanja 12 ate Charles Ssenkubuge owa DP nafuna akalulu 1 ate nga abalala tebafunyewo.
Ekisinze okucamula bannakampala kwekuba nti nekifo kyenyini Nabilah walondera ku Katuuso Church of Uganda Lukwago awangulidde waggulu battunka nabo.
Wano, Charles afunye 3, Nabillah Naggayi 95, Omuloodi Erias Lukwago afunye 414, Daniel Kazibwe 20 ate Joseph Mayanja nafuna 23.