Bya Ssemakula John
Kampala
Nnabbambula w’omuliro asaanyizzaawo ebintu bya bukadde mu muliro ogukedde okukwata ekisulo ky’abayizi ku ssomero lya Kings College Buddo erisangibwa e Buddo mu disitulikiti ey’ e Wakiso.
Omuliro guno gulabiddwa ku makya ga leero ku Lwokubiri era okusinziira ku bakulu mu ssomero lino tekitegeerekese kweguvudde.
Omwogezi wa Poliisi mu Kampala n’emirilaano, Luke Owoyesigire, agambye nti omuliro guno kirowoozebwa okuba nti gutandikidde mu kimu ku bizimbe okuli ebisulo bya S.3 awamu ne S.1 era gwatandise ku ssaawa emu ey’okumakya ng’abayizi bali mukusoma kw’okumakya.
“Abazimyamwoto batuuse dda era basobodde okugutangira okweyongerayo,” Owoyesigire bw’ategeezezza bannamawulire.
Obutambi obw’enjawulo bwakedde kusaasaanira mutimbagano nga bulaga ekisulo ky’abayizi abawala ekya Grace House nga kibengeyeza mu muliro.
Okusinziira ku Owoyesigire tewali mwana yenna alumiziddwa wadde nga waliwo ebintu ebyonoonese.
Essomero lino lisangibwa kilomita 12 okuva e Kampala mu ggombolola ye Nsangi mu Wakiso era nga lyatandikibwa mu 1906. Lino lisomeddemu abanene abamanya mu Bwakabaka era lyazimbibwa ku ttaka eryaweebwayo Obwakabaka bwa Buganda era okusooka lyasomerangamu abaana b’abaami wamu n’abakungu era lyali lya balenzi bokka.
Oluvannyuma n’abawala batandika okusomerayo era lyelimu ku masomero agasinga okuyisa abayizi mu ggwanga.