Bya Betty Namawanda
MASAKA- BUDDU
Omulimu gw’okuddaabiriza ennyumba entongole ey’omwami w’essaza ly’e Buddu amanyiddwa nga Ppookino ng’eno eyitibwa Buddukiro, guzzeemu oluvannyuma lw’okumala akaseera nga guyimiriziddwa.
Okuddaabiriza amaka g’Obwapookino gwatandika ku nkomerero y’omwaka oguwedde era mu kiseera kino ekitebe kino kyali mu mbeera mbi era yonna ng’etonnya.
Kino kyawalirizza Ppookino aliko kati Jude Muleke okukunga bannabuddu era n’atondawo olukiiko okusobola okunoonya ssente n’okulabirira omulimu gw’okuddaabiriza ennyumba eno.
Olukiiko luno lukulirwa omwami Elayisha Muwonge era ono mu kaseera k’okunoonya akalulu yavaayo n’ategeeza nti omulimu guno gwali guyimiriziddwa okusobola okuwa abantu obudde okunoonya akalulu kuba abamu ku bammemba ku lukiiko lwatwala baali beesimbyewo.
Bw’abadde atongozza okuddamu okuzimba Buddukiro, Ppookino Jude Muleke asabye bannabuddu okumanya nti akalulu kaggwa baddeyo bakole okutuusa essaza lyabwe ku ntikko.
Mu kwogera kwe Ssentebe w’olukiiko olukulembera enteekateeka y’okuzimba ennyumba eno, Elayisha Muwonge bw’abadde alambuza Ppookino Muleke n’abakulembeze be ssaza omulimu guno we gutuuse agambye nti obwetaavu bukyali bunene.
Muwonge agambye nti omulimu gwonna gwakumalawo ssente obukadde 260 era n’akakasa nti bakagutambuzaako ebitundu 25 ku buli 100 n’alaajanira bannabuddu okwongera okuwaayo ku nsonga eno.
Ennyumba eno Buddukiro nga ge maka ga Ppookino amatongole esangibwa ku mbuga y’essaza Buddu ku ssaza mu kibuga kya Ssaabasajja Kabaka Masaka nga yaserukululwa yonna era n’eteekebwako akasolya akapya akamategula era munda ssaako n’oluggya nabyo biri mu kuyooyotebwa okusobola okuggyayo ekitiibwa ky’essaza Buddu.