Bya Ssemakula John
Mmengo
Omulangira David Kintu Wasajja asabye abavubuka bulijjo obuteenyooma era bakimanye nti balina ettofaali ddene lye basobola okuteeka ku Buganda ne Uganda nga bayitira mu buweereza n’okuyitibwa okwenjawulo.
![](https://gambuuze.ug/wp-content/uploads/2021/01/143582445_3693111594100740_2607431116424205925_n.jpg)
Entanda eno Omulangira yagiwadde asisinkanye olukiiko olukulembera abavubuka ba Buganda olwa Buganda Youth Council mu woofiisi ye ku Masengere eggulo ku Lwokuna bwe baabadde bamwanjulira ezimu ku nteekateeka zaabwe.
Omulangira Wasajja yabuulidde abavubuka bano okwenyigira mu bukulembeze kubanga eng’ombo y’abavubuka be bakulembeze b’enkya tekyakola, era kino kyeyolekedde mu kalulu ka 2021 nga bangi ku baatutte ebifo, bavubuka.
“Buganda yeetaaga abakozi, twetaaga abantu ababugumyeko, mu mpisa, mu buvunaanyizibwa abajja okuweereza Obwakabaka ate ne ku mitendera emirala, tujja kwetaaga ebirowoozo byammwe era tujja kubawagira mu kisinde kye mutandiseeko eky’obuweereza mu bulamu bwammwe.” Omulangira Wasajja bwe yategeezezza abavubuka.
Omulangira yagambye nti okuva edda nga ogumu ku mirimu gy’Abalangira kwe kubeererawo abantu era nga kino baakugenda mu maaso okukikola.
Ate Ssentebe w’olukiiko lwa Buganda Youth Council, Baker Ssejjengo, yategeezezza omuyima waalwo, Omulangira Wasajja nti balina enteekateeka y’okuzimba obukulembeze okuva ku ssaza okutuuka wansi mu byalo era kuno basuubira okugattako okukyusa embeera z’abavubuka balemwe kukozesebwa bannakigwanyizi.
“Twagala okuyambako baganda baffe abawanduka mu masomero, tulina enteekateeka okulaba nga tutegekera abavubuka bano emisomo basobole okubaako kye bakola. Tulina enteekateeka okuyambako n’abavubuka abali mu masomero bamanye bye balina okusoma era n’okubabuulirira.”
Ono yagasseeko nti baakuteeka essira ku bavubuka bakome okuddukira mu bibuga naye bakozese ettaka lyabwe nga beeyambisa enteekateeka z’Obwakabaka ng’Emmwanyi Terimba.
Omuk. Ssejjengo yategeezezza nti balina essuubi nti nga balung’amizibwa Omulangira Wasajja, balina bingi bye bajja okutuukako basobole okukyusa obulamu bw’abavubuka mu Buganda.