Bya Ssemakula John
Lubiri – Mmengo
Omulangira Crispin Jjunju asabye abantu ba Kabaka abayivu okuddayo mu bitundu gye basibuka okukozesa obuyivu bwabwe, obukugu n’obumanyirivu okuggya abantu ba Ssaabasajja mu bwavu bwe balimu ensangi zino nga batandikira gye bava.
Omulangira bino abyogedde atikkula Amakula ga Kabaka okuva eri abaaliko abayizi mu ssomero lya Buddo mu mwaka gwa 2005 abakiise Embuga n’Amakula ga bukadde 5,000,000 mu Lubiri lwa Kabaka e Mmengo.
“Nsaba mwe nga bannabuddo mukke wansi mu byalo gye muva muyambeko okukozesa amagezi gammwe okulaba nti enteekateeka z’Obwakabaka ez’ebyenkulaakulana abantu bammwe gye muva bazettanira n’okuziganyulwamu.” Omulangira Jjunju bw’agambye.
Omulangira Jjunju era abakubirizza bulijjo okunnyikiza ebyobuwangwa n’Ennono mu miti emito, basobole okukula nga bamanyi bulungi ensibuko yaabwe ate n’obutabityoboola.
Bano abaasomako n’Omulangira Crispin Jjunjju mu mwaka gwa 2005 ku Kings College Buddo, abakulembeddwamu Eng . Apollo Lwanga, basiimye Obwakabaka olw’okufaayo okutumbula embeera z’abantu nga bayita mu nteekateeka ez’enjawulo.
Katikkiro w’ebyalo bya Kabaka, Omuk. Moses Luutu, yeebazizza bannabuddo olw’omyo gwa Buganda ogutafa gwe boolesezza era asabye n’abalala okubayigirako.
Enteekateeka ey’okuleeta Amakula Embuga ebaawo buli Lwakuna era abantu ba Ssaabasajja bonna bakubirizibwa okujjumbira enteekateeka eno kubanga luno lwoya lwa mu nnyindo.