Bya Francis Ndugwa
Bulange – Mmengo
Katikkiro wa Buganda Charles Peter Mayiga ategeezezza bannabyabufuzi abalonde abavudde e Kassanda obutatya bantu bye boogera naye bafeeyo okukola ennyo kuba wano olupimo weluri.
Okwogera bino Katikkiro abadde asisinkanye abakulembeze abalonde aba disitulikiti ye Kassanda era ensisinkano ebadde ku Bulange Mmengo leero ku Lwokutaano
.
“Mujja kusanga ebibasomooza bingi era omukulembeze tadding’ana bizibu, bajja kwogerera ebituufu n’ebitali bituufu, naye omukulembeze ekimutaasa byebyo byakola so ssi ebyo ebyogerwa abantu,” Mayiga bw’ababangudde.
Abasabye okumalirira okuweereza abantu bakole ku nsonga zaabwe ezibaluma kuba ebizibu byabwe tebyawula mu byabufuzi wadde eddiini kuba alemwa okuweereza abantu nebyebamukonjera abantu bajja kubikkiriza.
“Wadde abantu babalondedde mu langi ez’enjawulo naye mujjukire nti ebiruma abantu tebikyuuka. Ssentebe Kasirye ayogedde ku bwavu, ebyenjigiriza ezo z’ensonga ezitakyuuka,”Owek. Mayiga bw’agambye.
Owek. Mayiga abakuutidde obuteerabira nti Kassanda ali mu ssaza lya Kabaka erye Ssingo n’olwekyo balina okunyweza ensonga za Buganda Ssemasonga 5 kuba zeziwumbawumba Obwakabaka bye bwettanira.
Kamalabyonna Mayiga agamba nti ekimu ku bizibu ebiremesezza Afirika okukula bye by’obufuzi ebitaggwa kuba basigala bawalagana nebalemwa okwegatta bayambe abantu.
Katikkiro Mayiga bano abakulisizza akalulu era nabasiima olw’okujja embuga kuba buno bwe butaka bw’abantu ba Buganda awatali kwawula mu ddiini wadde endowooza z’ebyobufuzi.
Minisita w’Obuwangwa Ennono n’Obulambuzi, Owek David Kyewalabye Male, alabudde abaganda ku bikolwa ebyokwoleka ebizibu byabwe ate nga balina kukolera wamu okulaba nga bavvunuka obuzibu buno.
Owek. Kyewalabye asinzidde wano nalabula abamu ku bakulembeze abalonde abatandise okufulumya obutambi nga bagamba nti tebakyetaaga Buganda ekintu ekikyamu kuba Buganda lwazi.
Eyakulembeddemu abakulembeze bano era ssentebe wa disitulikiti y’e Kassanda, Kasirye Zimula Fred yeebazizza Kamalabyonna olw’emirimu gy’akolera Obuganda era n’asuubiza ku lwa banne okutambulira awamu ne Buganda.
“Ekirooto kyaffe nga abakulembeze ba Kassanda abapya kwekukolayo disitulikiti mu ggwanga lino ey’enjawulo era tulabye nga ekyo tetusobola kukikola nga tuli fekka. Tujja kukikola ne gavumenti eyawakati naye okusinga ennyo ne Mmengo kubanga wetuva,” Ssentebe Zimula bw’asuubizza
Bano baguze Satifikeeti ya 2,620,000/= okuwagira emirimu gy’Obwakabaka.