Bya Ssemakula John
Lubiri – Mmengo
Katikkiro w’Ebyalo byalo bya Ssaabasajja Kabaka, Omuk. Moses Luutu asabye abavubuka okwewala abayinza okubayingiza mu bikolwa ebitabangula eggwanga naddala mu kiseera kino nga ebikolwa by’okulumba ab’ebyokwerinda byeyongera buli lukya.
Omuk. Luutu agamba nti abavubuka bali okubeera abagezi mu kaseera kano era beesambe abantu abayinza okubasuula mu butego wakati nga gavumenti ekola ebikwekweto kwabo abateeberezebwa.
Bino Omuk. Luutu yabyogedde atikkula Amakula ga Ssaabasajja Kabaka okuva mu Bannabusiro ab’eggombolola ya Mutuba III Namayumba mu Lubiri e Mmengo eggulo ku Lwokusatu.
Ku bayizi abali mukukola ebibuuzo nga abalala bawummudde, Omuk. Luutu asabye abazadde okufaayo okulondoola abaana n’okubakuumirako amaaso baleme kuva ku mulamwa.
Omwami wa Kabaka amulamulirako eggombolola ya Mutuba III Namayumba, Lydia Nakiganda yeebaziza Obwakabaka olw’enteekateeka zebusaawo ezikyusa embeera zabantu era aweze nti bakwongera okunnyweza emirimu gya Kabaka nokujitwala mu maaso
Okusinziira ku Nakiganda, eggombolola eno esomoozebwa banakigwannyizi abeesomye okwesenza ku ttaka ly’Obwakabaka n’okugobaganya abantu ku ttaka lyabwe olwo nebasigala ttayo.
Kinajjukirwa nti buli Lwakusatu eggombolola ez’enjawulo zireetera Omutanda ebirabo oluvannyuma ebifuuka Amakula mu kaweefube w’okulaba nti embiri za Nnyinimu Ssaabasajja Kabaka tezikarira mu nsonga z’ebyokulya.