Bya Gerald Mulindwa
Kampala
Kamalabyonna wa Buganda Charles Peter Mayiga, akuutidde abafumbo naddala abasomyeko, okukomya okwezunguwaza kuba kino kisaanyizzaawo amaka agawera.
![](https://gambuuze.ug/wp-content/uploads/2020/10/298bef77-681b-460a-9eaa-d6c04dbc4828-1024x683.jpg)
Entanda eno Katikkiro agiweeredde ku kkanisa ya All Saints mu Kampala leero ku Lwokutaano, ku mukolo gw’okugatta Sheem Kawaddwa ne Nakafu Lilian Connie.
“Twagala abaana abo ab’olugave bategeere nti balugave ate e bukojja ba Mpindi, okwezunguwaza naddala mwe abayigirize, mwagala okwezunguwaza nemwerabira ebintu ebinaabayamba,” Mayiga bw’agambye
Abasabye okutegeera gye bava nga abaganda kubanga Buganda ebaddewo emyaka lukumi ate nga ensalo za Uganda jjuuzi wano.
Owek. Mayiga ategeezezza nti kye batunuulidde ng’abakulembeze mu Buganda kwe kuzza Buganda ku ntikko era bazzeewo ekitiibwa kya Buganda.
Kino baakukikola nga bayita mu kukulaakulanya abantu era bafune obulamu obweyagaza naye nga bino byonna tebasobola kubituukako singa amaka gabeera teganywedde.
Kamalabyonna agambye nti ennaku zino abantu tebaagala kufugibwa era ng’ebintu baagala bya mangu.
Alabudde abagole okumanya nti obufumbo bugenda bateekako ekkomo ku bintu ebimu byebabadde bakola.
Mayiga agamba nti kino kireeseewo abantu okumala gakola ebintu naye nga abantu balina okufugibwa okusobola okukola ebintu n’obuvunaanyizibwa.
Asiimye abazadde abazaala abagole olw’okufaayo ennyo.
Ate ye Ssaabalabirizi Stephen Kazimba Mugalu bw’abadde agatta abagole, abasabye okumanya nti kati beetongedde era nebakola gavumenti yaabwe bw’atyo n’abasaba batambuze bulungi gavumenti yaabwe.
Nakafu muwala wa Ssentebe wa Board ya Bbowa Vocational Institute e Luwero, Mw. Jonathan Ntulume.
Omukolo gwetabiddwako Ssaabaganzi, n’abakiise mu Bwakabaka bwa Buganda awamu n’abagenyi abalala.