Bya Gerald Mulindwa
Luweero
Kamalabyonna wa Buganda Charles Peter Mayiga asabye abantu ba Buganda okukola ennyo kubanga obwavu bufeebya ekitibwa kya Buganda ekiyimbibwa ku mikolo egy’enjawulo.
Bino Katikkiro abyogeredde Luweero nga aggalawo omusomo gw’abalimisa b’emmwanyi mu Buganda leero ku Lwokubiri
“Ekisinga okutumalako ekitibwa ekyo, bwavu. Era abasooka okujja naddala abagenyi oba bamisani oba abavuzi b’amatwale ekitibwa kyebalaba kyali kyesigamye ku mbeera eyali mu Buganda”, Katikkiro Mayiga bwateegezezza.
Katikkiro Mayiga era akunze abalimisa okufuba okulaba ng’ ekitibwa kya Buganda kiddawo kubanga bakyetaaga ate kati ku mulembe guno Omutebi.
Mayiga anyonyodde nga abazungu abasooka bwebeewunya ennyo obugunjufu n’okulakulana okwali mu Buganda.
“Ssekabaka Muteesa I yakulakulanya nnyo Buganda mu bukulembeze n’ennono n’embeera z’abantu era nga omuntu atalina lusuku lugudde akaleka oba abakyala abangi nga talya bwami”, Mayiga bweyalambise.
Yagasseeko nti ebbula ly’ emmere limalako abaganda ekitibwa n’okubeera mu mbeera nga tebasobola kusomesa baana wamu n’okutereeza embeera zabwe.
Katikkiro yakunze abalina ettaka balime era balunde okulaba nga beegobako olukokobe lw’obwavu kubanga okuva edda abaganda balimanga okusobola okwekulakulanya.
Yasabye abalimi okukozesa obukugu basobole okukuuma omutindo ate era bafunemu amagoba amalungi olwo balyoke bakulakulane.