Bya Shafic Miiro
Omumyuka Owookubiri owa Katikkiro era Omuwanika wa Buganda, Oweek. Robert Waggwa Nsibirwa agamba nti Buganda nazzikuno ng’abantu baayo beesigama ku buyiiya okufuna ensimbi ezayimirizaangawo amaka gaabwe.
Owek.Waggwa ategeezezza nti emirimu ng’okuweesa gyali gya nkizo ddala nga givaamu ensimbi n’ebintu ebikozesebwa ewaka ate n’ebyokwekuumisa.
Obubaka buno abuwadde ali ku mwoleso gw’ebiyiiye ebikolebwa n’ebyakolebwanga abaweesi ogubadde ku Makerere University nga gwatekeddwa Mw. Nsereko Raymond omunoonyereza ku bintu eby’edda.
Ono annyonnyodde nti singa ssi bakyeruppe kujja wano ne banafuya bye baasangawo nga babiyita ebya sitaani, ku buyiiya obwali mu Buganda ne Uganda ey’awamu enkulaakulana yandibadde ya maanyi nnyo kati.
Bw’atyo alaze obwetaavu obw’okuwagira emirimu egy’obuyiiya, mu Uganda okusobola okutumbula enkulaakulana era wano waategeereza nti Obwakabaka bumaliridde okuwagira emirimu egy’engeri eno.
Omutegesi w’ omwoleso guno Mw. Nsereko Raymond ategeezezza nga bwajja okwongera okumanyisa abantu ku biyiiye ebyedda nokubibaagazisa.