Bya Ssemakula John
Kampala
Obwakabaka bwa Buganda bukungubagidde abajaasi b’eggye lya UPDF abafiiridde e Somalia mu bulumbaganyi obwabakoleddwako abakambwe ba Alshabaaba.
Obubaka obwakufulumiziddwa ku Lwokubiri nga buliko omukono gwa minisita w’ensonga z’Amawulire era Omwogezi w’Obwakabaka, Owek. Noah Kiyimba busaasidde ab’enju awamu n’enganda z’ abagenzi awamu n’ eggye lya UPDF olw’ekizibu kino.
Obwakabaka era busaasidde abo abafunye ebisago era nebusaba bannansi okubateeka mu ssaala basobole okusuuka amangu.
Okusinziira ku minisita Kiyimba, basuubira nti wagenda kubaawo okunoonyereza okuzuula ekyavuddeko obuzibu buno era busalirwe eddagala buleme kuddamu kubaawo.
Obwakabaka era bukubirizza ebiwayi eby’enjawulo ebiri mu ggwanga lino awamu n’ekibiina ky’amawanga amagatte okulaba nti Somalia ebeeramu emirembe, kisobozese abo abatwalibwayo okukuuma emirembe okudda okwabwe.
Bino webijjidde ng’omuwendo gw’abajaasi omutuufu ogwafiiridde mu bulumbaganyi buno tegunamanyika wadde eggye lya UPDF lyaweze okunoonya era likwate ababadde emabega w’ettemu lino.